Türkiyə nəhənglərinin dördünün eyni gündə hazırlıq matçı keçirməsi nadir hallarda baş verir.

"Football-plus.az" xəbər verir ki, iyulun 15-də nəhənglərin hamısı meydana çıxdı. Rusiyada ''Fənərbaxça''nın təmsilçimiz ''Neftçi''ni minimal hesabla üstələdiyini xəbər vermişdik. Avstriyada toplanışda olan ''Qalatasaray''ın ardıcıl 2 gün oyun keçirməsi diqqət çəkdi. İyulun 14-də Vyana ''Austriya''sı ilə 1:1 bərabərə qalan Türkiyə çempionu bu oyundan cəmi 24 saat sonra Macarıstanın aşağı liqa təmsilçisi ''Çakvar'' ilə qarşılaşıb. Bu oyun toplanışın gedişində planlaşdırılıb. Çünki daha öncə klubdan verilən açıqlamada təqvimdə belə bir oyun yox idi. İcarədən qayıdan Morutsanın erkən qolu ilə hesabda önə keçən İstanbul nəhəngi ikinci hissənin əvvəllərində daha 3 qol vurub. 5 dəqiqə aralığında həm Kaan Ayhan fərqlənib, həm də Zanyolo dubl edib. Ümumiyətlə italiyalı ulduz bu görüşdə əla oyun sərgiləyib. Yeni transfer Anxelinyo da 2-ci hissədə oyuna daxil olaraq ilk dəfə şans qazanıb. Almaniyada toplanışda olan ''Beşiktaş'' da bu yayın ilk hazırlıq oyununu keçirib. Görüş qalmaqallı alınıb. Kufştayn bölgəsində bundesliqa təmsilçisi ''Auqsburq'' ilə qarşılaşan ''Qartal'' Mulekanın qolu ilə fasiləyə öndə yollanıb. ''Auqsburq'' 59-cu dəqiqədə bərabərlik qolunu vurub. 79-cu dəqiqədə isə hakim ''Beşiktaş''lı fanatların tribunada səs bombası və petarda partlatması üzündən oyunu yarımçıq dayandırmalı odub. Buna qədər ikinci hissənin əvvəllərində hakim eyni səbəb üzündən artıq bir dəfə oyunu saxlamalı olmuşdu. Eyni hal təkrar olunca matç dayandırılıb. Sloveniyada toplanışda olan ''Trabzonspor'' isə 2-ci oyununu keçirib. İlk hazırlıq matçında ''Hayduk''a 0:2 məğlub olan Trabzon təmsilçisi bu dəfə ''Fehervar'' ilə qarşılaşıb və oyun 2:2-lik bərabərliklə yekunlaşıb. Qaradənizlilərin qollarını Maksi Qomes ilə Enes Bardi vurub.

ƏLİ