Türkiyə təmsilçiləri növbəti hazırlıq oyunlarında qüvvəsini sınayıb.

"Football-plus.az" xəbər verir ki, Avstriya toplanışını başa vuraraq vətənə qayıdan “Fənərbaxça” srağagün Acun Ilıcalının sahibi olduğu çempionşip təmsilçisi “Hall Siti” ilə qarşılaşıb. Bilindiyi kimi, Acun həm də “sarı-lacivərdlilər”in vitse-prezidentidi. “Ülkər” stadionunda keçirilən görüşdə İstanbul nəhəngi 5:1 hesabıyla qalib gəlib. Oyunun ulduzu 2 qol, 1 məhsuldar ötürməlik performans sərgiləyən Ceko olub. Digər qolları isə Fred, Şimanski və Mərt Hakan Yandaş vurub. Mərt Hakanın təxminən 40 metrədən sol ayağı ilə qapıçının başı üzərindən vurduğu qol xüsusilə baxımlı alınıb. Bu qola hətta Joze Mourinyo da təəccübünü gizlədə bilməyib. Bu oyunla “Fənər” hazırlıq maçlarını tamamladı. Komanda gələn həftə Çempionlar Liqasının 2-ci təsnifat mərhələsində səfərdə “Luqano” ilə qarşılaşacaq.

“Qalatasaray” da, nəhayət, hazırlıq oyununda fanatlarını sevindirməyi bacarıb. İlk görüşdə Avstriya təmsilçisi LASK-a 2:3, ikinci oyunda 2-ci bundesliqa təmsilçisi Düsseldorf “Fortuna”sına 2:5 uduzan Türkiyə çempionu 3-cü oyunda Slovakiya təmsilçisi “Trençin” ilə qarşılaşıb. İstanbul nəhəngi bu dəfə 4:1 hesablı inamlı qələbə qazanıb. Qolları hesabına Kön, Ziyeş, Mertens və Batşuayi yazıb. Bu yay “Fənərbaxça”dan ayrılaraq “Cim-Bom”a gələn Batşuayi yeni klubunda ilk dəfə qol sevinci yaşayıb. Belçikalı ulduz qolla yanaşı, hesabına iki məhsuldar ötürmə də yazıb. Bu oyunla “Qalatasaray” Avstriya toplanışının ilk hissəsini başa vurub. Komanda Avstriya toplanışının ikinci hissəsində iyulun 24-də “Leççe”, 27-də “Parma” ilə qarşılaşacaq. Fiziki cəhətdən tam hazır olmadığına görə ilk 3 oyunda iştirak etməyən İkardinin “Leççe” ilə oyundan etibarən şans qazanacağı gözlənilir. Şayiələrə inansaq, Vanda Nara ilə ayrılandan sonra depressiyaya düşən argentinalı forvard 6 kq arıqlayıb!

“Beşiktaş” üçün isə Sloveniya toplanışı istənilən səviyyədə keçmir. İyulun 13-də Zaqreb “Dinamo”suna qarşı keçirilməsi planlaşdırılan yoxlama oyunu əlverişsiz hava şəraiti üzündən ləğv edilmişdi. İyulun 17-də isə “Qartal” “Şaxtyor”la qarşılaşdı və minimal hesabla uduzdu. Yeni transferlərdən Qabriel Paulista ilə Rafa Silva start heyətində oynadığı halda, Çiro İmmobilenin adı iştirak ərizəsinə salınmamışdı. “Ağ-qaralar” toplanışı bu gün Avstriya təmsilçisi QAK-a qarşı oyunla başa vuracaq. “Antalyaspor” isə Aleks de Souzanın başçılığı altında məğlubiyyətləri sıralayır.

Daha öncə Rusiya təmsilçisi “Akron”a 2:3 uduzan Antalya klubu bu dəfə Qətərin aşağı liqa təmsilçisi “Əl-Xor”a boyun əyib - 1:2.