Joze Mourinyonu gətirməsinə rəğmən, transferdə susqun görünən “Fənərbaxça” bu həftədən etibarən fanatlarını sevindirmək niyyətindədi.

Şayiələrə inansaq, artıq iki yeni ismin keçidi həll olunub. Bunlardan biri Allan Sen-Maksimen, digəri isə Cenk Tosundu. “Nyukasl”dakı çıxışı ilə tanınan və ötən yay 27 milyon avroya Səudiyyə Ərəbistanı təmsilçisi “Əl-Əhli”yə yollanan Sen-Maksimen qısa müddət ərzində İstanbula gələcək. Əslində bir ara bu transfer düyünə düşmüşdü. Çünki Səudiyyə Ərəbistanı Futbol Federasiyasında klubların maddi durumuna nəzarət edən komitə bu keçidə veto qoymuşdu. Daha doğrusu, həmin komitə futbolçunun icarəyə verilməsinə qarşı idi.

“Fənər” isə Qvadelupe əsilli fransalı vingeri daimi əsasda transfer etmək gücündə deyildi. Uzun danışıqlardan sonra ərəblərin belə desək, müqavimətini qırmaq mümkün oldu. Daha öncə “Sent-Etyen”, “Hannover-96”, “Bastiya”, “Monako”, “Nitsa” və “Nyukasl”da top qovmuş Sen-Maksimen 2023/24-də 31 rəsmi oyunda 4 qol, 10 məhsuldar ötürmə ilə fərqlənib. Cenk Tosunu isə Türkiyə futbolu ilə yaxından maraqlananlara xüsusi təqdim etməyə ehtiyac yoxdu. Məhz “Qartal”da ulduz səviyyəsinə yüksələn və karyerasının ən yaxşı illərini bu klubda keçirən təcrübəli forvard əzəli rəqibin heyətinə keçmək üzrədi. Mayın 31-dən azad agent statusunda olan bu futbolçu ilə rəhbərlik arasında heç cür yeni müqavilə ilə bağlı razılıq əldə olunmadı. Halbuki ötən mövsümün gedişində Türkiyə mətbuatı dəfələrlə onların anlaşmağa yaxın olduğunu iddia etmişdi.

33 yaşlı futbolçu “müqaviləmin müddəti bitəndən sonra “Beşiktaş”dan yeni təklif gözlədim, amma təklif irəli sürmədilər” ifadəsini işlədib. Komandanın baş əlaqələndiricisi Samet Aybaba isə “biz hələ AÇ-dən əvvəl onunla bir yox, bir neçə dəfə görüşdük, amma pul məsələsini müzakirə etmədik” sözləri ilə Cenkin cavabını verib. Beləcə Tosunun “Beşiktaş” macərası heç də xoş şəkildə başa çatmadı. Cenkin tətilini başa vuraraq bu gün İstanbula gələcəyi və “Fənərbaxça” ilə ikiillik müqavilə imzalayacağı gözlənilir. Bu iki il ərzində onun ümumi qazancı imza parası da daxil olmaqla 2,5 milyon avronu ötməyəcək. Hər halda, bu, türkiyəli həmkarlarımızın iddiasıdı. Karyerasına “Ayntraxt”da başlayan, daha sonra “Qaziantepspor”da adından söz etdirən Cenk Tosun 2014-dən bəri üç fərqli dönəmdə “Beşiktaş”ın şərəfini qoruyub. Bu müddətdə onun “Everton” və “Kristal Pelas” macərası da olub. Cenk “ağ-qaralar”da ümumilikdə 226 rəsmi oyunda 96 qol, 28 məhsuldar ötürmə ilə fərqlənib və 5 titul qazanıb.

Onu da bildirək ki, “Fənərbaxça” Avstriya toplanışını başa vuraraq vətənə qayıdıb. İyulun 13-də, toplanışın son günündə “Fənər” Fransa təmsilçisi “Strasbur”u Şimanski, Tadiç, Kent və Cekonun qolları ilə darmadağın edib – 4:0. Bütün qollar ilk yarıya təsadüf edib. İyulun 23-də “sarı-lacivərdlilər”i ÇL-in 2-ci təsnifat mərhələsinin ilk oyununda səfərdə “Luqano” ilə qarşılaşacaq.