''Fənərbaxça''nın ilk rəsmi oyununa 2 həftədən də az vaxt qalıb.

Komanda Çempionlar Liqasının 2-ci təsnifat mərhələsində iyulun 23-də ''Luqano'' ilə qarşılaşacaq. Amma heyət hələ də güclənilmir. Fanatlar artıq sosial şəbəkələrdə bununla bağlı narazılıqlarını dilə gətirməyə başlayıblar. Düşünmək olardı ki, Joze Mourinyonun gəlişindən sonra heyətə ulduzlar cəlb olunacaq. Amma bu baxımdan hələ ki, ümidlər doğrulmur. Bu arada Türkiyə mətbuatının iddiasına görə ''Fənər'' Allan Sent-Maksimin ilə ilkin razılıq əldə edib. Daha öncə ulduzu ''Nyukasl''da parlayan Qvadelupe əsilli fransalı vinger ötən yay 27 milyon avroya Səudiyyə Ərəbistanı təmsilçisi ''Əl-Əhli''yə transfer olunmuşdu. 27 yaşlı futbolçu ötən mövsümü 31 oyun, 4 qol, 10 məhsuldar ötürmə göstəriciləri ilə tamamladı. ''Əl-Əhli'' ilə 2026-ya qədər müqaviləsi olan və Səudiyyə Ərəbistanında kifayət qədər böyük pullar qazanan Sent-Maksiminin ilk baxışdan Türkiyəyə gəlişi mümkünsüz görünürdü. Amma Mourinyo özü şəxsən onunla danışaraq Türkiyəyə gəlməyə razı salıb.

O, illik qazancının əhəmiyyətli dərəcədə azalmasına razı olub. ''Fənər'' bu futbolçunu birillik icarəyə götürəcək. Maddi detallar daha sonra açıqlanacaq. Əsasən sol vinger mövqeyində oynayan Sent-Maksimin başgicəlləndirici driblinqləri və cinah keçidləri ilə tanınır.

ƏLİ