Səudiyyə Ərəbistanının Dövlət İnvestisiya Fonduna məxsus olan şirkətin tabeçiliyinə keçdikdən sonra dünyanın ən varlı klublarından birinə çevrilən ''Nyukasl'' belə desək, ərəblərin milyonlarını xərcləməkdə davam edir.

Ötən mövsümün qış fasiləsində 42 milyon avroya ''Lion''dan Bruno Gimrayanşı, 30 milyon avroya ''Bernli''dən Kris Vudu və 15 milyon avroya ''Atletiko''dan Kiran Trippyeni heyətinə qatan komanda bu yay artıq iki keçidi reallaşdırıb. ''Sağsağanlar'' 17,5 milyon avroya ''Aston Villa''dan Mett Targett'ı və 11,5 milyon avroya ''Bernli''dən qapıçı Nik Poupu transfer edib.

Komanda indi də ''Lill''dən Sven Botmanı transfer etmək üzrədi. 22 yaşlı niderlandlı mərkəz müdafiəçisi yeni klubuna 45 milyon avroya başa gələcək! Ötən mövsüm ''Lill''də 32 rəsmi oyunda forma geyən Botman əslində ''Milan''a keçməyə çox yaxın idi. Amma son İtaliya çempionu yekun qərar verməkdə çətinlik çəkincə araya ''Nyukasl'' girdi. ''Lill'' Botmanı 2020-nin yayında 8 milyon avroya ''Ayaks''dan transfer edib.