Rusiyada futbol mövsümünə həmişəki kimi superkubok uğrunda oyunla start verildi.

Bazar günü Volqoqradda 40 mindən çox azarkeşin izlədiyi oyunda “Zenit”lə “Krasnodar” üz-üzə gəldi. Sankt-Peterburq nəhəngi ötən mövsüm həm çempionatın, həm də kubokun qalibi olmuşdu. Bu üzdən “Krasnodar” gümüş medalçı kimi tarixində ilk dəfə superkubok uğrunda oyuna çıxdı. Amma Murad Musayevin komandası hazırda Rusiya futbolunda ağalıq edən piterlilərə layiqincə müqavimət göstərə bilmədi. Xüsusilə ilk yarıda “Krasnodar” pərən-pərən düşdü. Komanda rəqib qapısına yaxınalaşmaqa çətinlik çəkdiyi halda, “Zenit” az qala hər təhlükəli hücumu qola çevirdi. Mərkəz müdafiəçisi Rodriqao başla erkən qol vurdusa, künc zərbəsindən sonra Vendel fərqi iki topa çatdırdı. “Zenit”in yeni transferi Maksim Qluşenkovun debütü isə nağıllardakı kimi alındı. Ötən mövsüm “Lokomotiv”də ulduzu parlayan və bu yay hay-küylü şəkildə 6,3 milyon avroya “Zenit”ə transfer olunan 24 yaşlı futbolçu fasilə ərəfəsində hesabı darmadağın həddinə çatdırdı.

İtiriləsi bir şeyi qalmayan və irəli atılan “Krasnodar”ın sayəsində ikinci hissə daha maraqlı alındı. Komandanın heyətində ən yaxşılardan olan Krivtsovun baxımlı qolundan sonra Qluşenkov yenidən fərqlənərək dubl etdi. Yekun nəticəni isə Smolov müəyyənləşdirdi. Bu yay 6 illik fasilədən sonra “Krasnodar”a qayıdan və klub tarixinin ən məhsuldar futbolçusu statusunda olan 34 yaşlı forvard bütün turnirləri nəzərə almaqla ən yüksək səviyyədə Rusiya klublarında ümumilikdə 150-ci qolunu vurdu.

Məhsuldarlıq baxımından superkubokun rekordu təkrarlandı. Daha öncə yalnız bir dəfə - 2007-ci ildə ÇSKA – “Spartak” (4:2) oyununda 6 qol vurulmuşdu. “Zenit”in bu rəqibə ardıcıl 13-cü rəsmi oyunda uduzmadığını da bildirək (9 qələbə, 4 heç-heçə). Beləliklə, “Zenit” ardıcıl 5-ci, müstəqillik dönəmində 9-cu, tarixində 10-cu dəfə bu titula sahib çıxdı. Semak isə piterlilərin başında 13-cü titulunu qazandı. Yəni bu klubun tarixi ərzində əldə etdiyi 30 titulun 13-ü bu məşqçinin payına düşür! Bununla da Semak Rusiya futbolunda titul sayında rekordçu olan Oleq Romantsevin göstəricisini təkrarladı. “Zenit” 2024-cü ildə Rusiya futbolunda mümkün olan bütün titullara sahib çıxdı!

Zenit – Krasnodar 4:2
Rodriqao, 13. Vendel, 33. Qluşenkov, 42; 68 – Krivtsov, 65. Smolov, 70.

Zenit: Latışonok, Karavayev (Pedro, 65), Yerakoviç, Rodriqao (Alip, 66), Santos, Barrios, Vendel (Artur, 75), Klaudinyo (Mantuan, 62), Mostovoy (Qorşkov, 62), Qluşenkov, Kassyerra.

Krasnodar: Aqkatsev, Olusequn (Yektov, 76), Tormena, Kayo, Pina (Kobnan, 75), Çernikov, Krivtsov (Kovalevski, 83), Batçi (Kozlov, 76), Spertsyan, Sa, Smolov.