Ötən bazar Rusiyada da futbol mövsümünə yekun vuruldu.

“Football-plus.az” xəbər verir ki, “Lujniki”də keçirilən kubokun finalında “Baltika” ilə “Zenit” üz-üzə gəldi. Kalininqrad təmsilçisi premyer-liqada mövsümün sonunu çox bərbad keçirərək aşağı liqaya yuvarlandı. Ona görə də Sergey İqnaşeviçin komandası üçün kubokda finala yüksəlməyin özü artıq böyük uğur sayılırdı. Amma “Baltika” adlı-sanlı rəqibindən heç də zəif futbol sərgiləmədi. Əksinə, “Baltika”nın inamlı oyunu piterlilər üçün də sürpriz oldu. Elitanı tərk edən komanda fasiləyə üstün yollandı, üstəlik 2-ci hissədə də gözəl fürsətləri boşa verdi. Amma daha bir titul qazanmaq şansını əldən vermək istəməyən “Zenit” son yarım saatda ayıldı. Vendelin qolu VAR-ın işə qarışmasından sonra qeydə alınmasa da, “Zenit” son 10-15 dəqiqədə oyunu öz xeyrinə çevirməyi bacardı. Özü də müdafiəçilərin hesabına. Bir mərkəz müdaiəçisi - Nino bərabərlik, digəri – Alip isə qələbə qolunu vurdu! Özü də Qazaxıstan yığmasının üzvü olan Alip “Zenit”in heyətində 62-ci rəsmi oyunda ilk dəfə fərqləndi. Final fitindən sonra piterlilərin sevincini görməyə dəyərdi. Bu da təsdüfi deyil. Axı komanda tarixində ilk dəfə mövsümü daxili “trebl” ilə başa vurdu. Bu mövsüm “Zenit” daha öncə çempionluğu və ölkə superkubokunu da qazanmışdı. Müstəqillik dönəmində “Zenit” artıq 26-cı titulunu qazanaraq bu göstəricidə ən yaxın rəqibi ÇSKA-dan (22) bir qədər də uzaqlaşdı. Amma konkret ölkə kubokunu piterlilər müstəqillik dönəmində cəmi 5-ci dəfə qazandılar və bu göstəricidə “Lokomotiv”lə (9) ÇSKA-dan (8) geri qalırlar. Sergey Semak da titul kolleksiyasını zənginləşdirməkdə davam edir. 48 yaşlı mütəxəssis “Zenit”də keçirdiyi 6-cı mövsümdə qazandığı titulların sayını 12-yə çatdırdı! Sonda onu da vurğulayaq ki, iyulun 13-də keçiriləcək superkubok matçında “Zenit” premyer-liqada mövsümü 2-ci pillədə tamamlayan “Krasnodar”la qarşılaşacaq.

final
Baltika – Zenit 1:2
Aleks, 40 – Nino, 81. Alip, 90+5.
Zenit: Adamov, Yerakoviç (Mantuan, 46), Nino, Alip, Barrios, Vendel (İzidor, 90+1), Klaudinyo, Artur (Yeroxin, 64), Pedro (Mostovoy, 84), Sergeyev (Karavayev, 46), Kassyerra.