“Fənərbaxça” ilə bağlı növbəti transfer xəbəri var.
“Football-plus.az” xəbər verir ki, tanınmış kolumbiyalı hücumçu Alfredo Morelos tibbi müayinədən keçmək, son detalları razılaşdırmaq və İstanbul nəhəngi ilə müqavilə imzalamaq üçün srağagün gecə saatlarında Türkiyəyə gəlib. 27 yaşlı futbolçu son illərdə “Reyncers”in heyətindəki məhsuldarlığı ilə populyarlıq qazanıb. 2017-dən bəri Qlazqo nəhənginin şərəfini qoruyan Morelos uzun illər bu komandanın əsas qol silahı idi. Amma o, ötən mövsüm əsas heyətdəki yerini itirməyə başladı. Morelos iştirak etdiyi 45 rəsmi oyunun yalnız 23-də start heyətində meydana çıxdı. Buna baxmayaraq, komandasına 12 qol, 6 məhsuldar ötürməlik fayda verdi. İyunda onun “Reyncers”lə müqavilə müddəti bitdi və forvard klubdan ayrılaraq sərbəst oyunçuya çevrildi. Bir sıra Avropa və Rusiya klublarının hədəfində olan Morelosun İstanbul nəhəngi ilə üçillik müqavilə imzalayacağı gözlənilir. Transferin digər detalları barədə məlumat yoxdu. “Reyncers”də 6 mövsüm ərzində 269 oyuna çıxaraq 124 qol, 58 məhsuldar ötürməlik performans sərgiləyən Morelos Kolumbiya yığmasında 11 oyun keçirib və 1 qol vurub. Qeyd edək ki, “Fənər” bu yay “Reyncers”dən daha bir futbolçunu – Rayan Kenti də transfer edib.
Hücum xətti ilə bağlı problemi olmayan “sarı-lacivərdlilər”in birdən-birə hücumçu transfer etmək istəyi Mişi Batşuayi ilə bağlıdı. Edin Cekonun transferindən sonra əsas heyətdəki yerini itirən təcrübəli belçikalı forvard daha çox oynamaq istəyir. Baş məşqçi İsmayıl Kartal isə ona əsas heyət üzvü kimi baxmır. Bu üzdən Batşuayi menecerinə onun üçün yeni klub tapmağı tapşırıb. Şayiələrə inansaq, bu futbolçu yenidən İngiltərəyə qayıtmaq üzrədi. Onun premyer-liqa təmsilçisi “Nottingem Forest”lə anlaşdığı deyilir. “Fənər”in yaxın günlərdə rəsmən açıqlanacağı gözlənilən bu satışdan təxminən 6,5 milyon avro gəlir əldə edəcəyi iddia olunur. 29 yaşlı oyunçu ötən yay 3,5 milyon avroya “Çelsi”dən transfer olunmuşdu. Batşuayi “Fənər”də indiyə qədər 38 rəsmi oyunda 22 qol, 3 məhsuldar ötürməlik diqqətçəkən performans ortaya qoyub. Maraqlıdı ki, transfer şayiələrinə baxmayaraq, Batşuayi İstanbul nəhəngi ilə birlikdə Niderlanda yollanıb. Bilindiyi kimi, komanda bu gün KL-in pley-offunun cavab oyunu çərçivəsində “Tvente” ilə qarşılaşacaq. Batşuayinin düşərgədə olması təəccüblə qarşılanıb.