Türkiyədə qış transfer dönəmi bu gün başa çatacaq.

Klublar transferdə son addımları atmağa hazırlaşırlar. Saşa Boe və Sedrik Bakambu ilə vidalaşan, onların yerinə Karlos Vinisius və Serj Oryeni transfer edən ''Qalatasaray'' daha 2 futbolçu ilə vidalaşmağa hazırlaşır. Söhbət Xəlil Dərvişoğlu ilə Kazımcan Karataşdan gedir.

Dərvişoğlu ''Çaykur Rizəspor''a, Karataş isə ''Ankaragücü''yə mövsümün sonuna qədər icarəyə veriləcək. Artıq anlaşmalar əldə olunub və hər iki keçidin gün ərzində açıqlanacağı gözlənilir. Ötən yay ''Brentford''dan 500 min avroya alınan və ''Cim-Bom''da ikinci dönəmini keçirən Xəlil heç cür əsas heyət üzvünə çevrilə bilmədi. 24 yaşlı forvard bu mövsüm 20 rəsmi oyunda 4 qol, 1 məhsuldar ötürmə ilə fərqlənib.

Ötən mövsümün qış fasiləsində 1,2 milyon avroya ''Altay''dan transfer edilən Kazımcan isə Okan Buruk tərəfindən kifayət qədər şans qazansa da, özünü yaxşı tərəfdən göstərə bilmədi. Təsadüfi deyil ki, Kazımcanın çıxış etdiyi müdafiənin sol cinahı komandanın ən problemli mövqeyi sayılır. Buruk mövsümün gedişində o mövqedə 6 futbolçunu sınaqdan keçirib. Daha bir sol müdafiəçi Anxelinyo da bu qış müqavilə ilə məxsus olduğu ''Leyptsiq''ə geri göndərilib. 21 yaşlı Karataş bu mövsüm 12 rəsmi oyuna çıxıb və məhsuldar hərəkətlə fərqlənməyib.

ƏLİ