Ötən sayımızda “Fənərbaxça”nın hücum xəttində dəyişikliklər ola biləcəyini xəbər vermişdik.

"Football-plus.az" xəbər verir ki, belə ki, Mişi Batşuayinin komandadan ayrılması, onun yerinə isə Alfredo Morelosun transfer edilməsi gündəmdə idi. Amma belə görünür, bunlardan heç biri baş tutmayacaq. Batşuayi komanda ilə birlikdə “Tvente” ilə oyun üçün Niderlanda yollansa da, meydana çıxmamışdı. Təcrübəli belçikalı forvardın premyer-liqa təmsilçisi “Nottingem Forest”ə transferi gündəmdə idi. Batşuayinin meneceri Londonda ingilislərlə danışıqlar aparırdı. Amma bu transfer baş tutmadı. Tərəflər arasında razılıq əldə olunmadı. “Fənər” bu satışdan ən azı 6,5 milyon avro gəlir əldə etməyi planlaşdırırdı. Transferin baş tutmamasının səbəbi bəlli deyil. Hər halda, ya ingilislərin təklifi istanbulluları qane etmədi, ya da Batşuayi son anda fikrini dəyişərək “Nottingem Forest”ə keçməkdən imtina etdi. Bəzi mənbələr iddia edir ki, futbolçu ilə yeni klubu arasında maaş məsələsində anlaşma əldə etmək mümkün olmayıb. 29 yaşlı oyunçunun meneceri başqa klublarla danışıqlar aparır. Amma Batşuayinin Avropaya yolu faktiki bağlandı. Çünki dünən gecə Avropanın əksər ölkələrində yay transfer dönəmi başa çatdı. Qalır yalnız Səudiyyə Ərəbistanı. Ordan da bir təklif gəlməsə, Batşuayi “Fənərbaxça”da qalacaq.

Belçikalı ulduzun bu durumu avtomatik Alfredo Morelosun da transferinə təsir etdi. Çünki “Fənər” bu oyunçunu məhz Batşuayinin əvəzinə heyətə qatmaq istəyirdi. Avqustun 29-da Türkiyəyə gələn və tibbi muayinədən keçən kolumbiyalı forvard “Fənər”dən cavab gözləyirdi. Amma Batşuayi üzündən “sarı-lacivərdlilər” 27 yaşlı futbolçudan vaz keçməli oldular. Morelos dünən İstanbuldan ayrıldı. Türkiyə mətbuatının yazdığına inansaq, “Fənər”in transferdən vaz keçməsinin daha bir səbəbi Morelosun hədsiz çılğın olmasıdı. Qələbələri sıralayan və mövsümün əvvəlindən bəri rəqib tanımayan İstanbul nəhəngində hazırda əla ab-hava var. Morelos çətin xarakteri ilə bu ab-havanı korlaya bilərdi. Təkcə bir faktı vurğulayaq ki, 6 mövsüm ərzində o, “Reyncers”də 8 qırmızı vərəqə almışdı! Bunların 5-i təkcə 2018/19 mövsümünə təsadüf edib. Həmin “futbol ili”ndə o, Serxio Ramosun rekordunu yeniləyərək Avropada bir mövsümə ən çox qırmızı vərəqə alan futbolçuya çevrilmişdi.

Yeri gəlmişkən, “Fənər” Almaniyada doğulan 16 yaşlı yeniyetmə qapıçı Ömər Bircan ilə 3 illik peşəkar müqavilə imzalayıb. Türkiyənin U-16 yığmasının kapitanı olan 2007-ci il təvəllüdlü qapıçı “Piza”, “Auqsburq” və “Midtyullan”dan təkliflər alsa da, istanbullulara üstünlük verib. İstedadlı qapıçı əsas komanda ilə məşqlərə, “Fənər”in U-19 komandası ilə isə oyunlara çıxacaq.