“Araz-Naxçıvan” premyer-liqadakı ilk ilində uğurlu ola bilmədi.

Belə ki, “qırmızı-ağlar” mövsümün əvvəlində yüksək yerlər uğrunda mübarizə aparırdısa, indi hədəf 8-ci yeri tutmaqdı. Başverənlərlə bağlı komandanın aparıcı oyunçularından biri, son vaxtlar adı tez-tez transfer xəbərlərində görünən Turan Manafovla danışdıq.

- Komandanın hazırda qərarlaşdığı yer sizi qane edir?
- Xeyr. Fikrimcə, qışaqədərki vəziyyətə, yəni qazandığımız qələbələrə, xallara görə bu yerə layiq deyilik. Sadəcə, bu mənim öz düşüncəmdi. Ancaq reallıq odu ki, bu gün “Araz-Naxçıvan” turnir cədvəlində 9-cu pillədədi. Çox xal itirdik. Xal itirdiyimiz oyunların müəyyən bir hissəsində günah bizdə idisə, böyük hissəsində hakim qərarlarının təsiri oldu. Bu da öz növbəsində komandaya çox təsir etdi. İkincisi, uduzduğumuz oyunlarda belə həqiqətən də pis futbol oynamamışıq. Yəni əksər qarşılaşmalarda məğlub olsaq belə, baxımlı oyun sərgiləmişik. Dediyim kimi, yenə də öz fikrimdə qalıram. Komandanın hazırda yer aldığı pillə məni qane etmir.

- Mövsümə yaxşı başlamışdız, lakin bir müddət durğunluq, ardından geriləmə baş verdi. Bunu nə ilə əlaqələndirisən?
- Doğrudu, mövsümə həddən artıq yaxşı başladıq. Əslində yaxşı da gedirdik və davamının da yaxşı gələcəyini düşünürdük. Ancaq qış fasiləsinin sonuncu oyunundan sonra hakim idarəçiliyi ilə bağlı bizə münasibətdə çox qərəzli qərarlar oldu. Yəni bunlar faktdı, danılmazdı. O qədər oyun saya bilərəm ki... Həqiqətən bəlkə də həmin qərəzli qərarlar olmasaydı, biz bu qədər xal itirməzdik. Ən azı 4-5-ci yerləri tuta bilərdik. Ancaq hakim qərarları buna mane oldu. Doğrudu, öz səhvlərimiz ucbatından da məğlub olduğumuz oyunlar oldu, amma çox az. Qısası, komandanın bu yerdə olmasının başlıca səbəblərindən biri kimi qərəzli hakim qərarlarını göstərə bilərəm.

- Azər Bağırovla şəxsi münasibətlərində problem olub? Çünki onun komandadan ayrılmasının səbəblərindən biri kimi Orxan Əliyevlə yanaşı, səninlə də yola gedə bilməməsi göstərilir.
- Bu barədə harda deyilib, yazılıb, bilmirəm. Amma Azər Bağırovla məşqçilikdən əlavə bir dost kimi yaxın münasibətim var. Ailəmi də tanıyır, çox yaxşı münasibətimiz var. Ara-sıra görüşüb-danışırıq. Həqiqətən də məşqçilikdən kənarda bir dost, yoldaş kimiyik. Yəni vaxt olanda görüşüb-söhbətləşirik, çay içirik. Elə bil şey qətiyyən olmayıb. Verdiyiniz sualın tam əksi, elə bura gələndə də əsas səbəbkar Azər müəllim olmuşdu. Doğrudu, ona qədər, sadəcə, adını eşitmişdim, ancaq şəxsiyyət kimi bura gələndən sonra tanıdım. Həm məşqçi, həm də insan kimi super şəxsiyyətdi. Ona görə də qalan fikirlər absurddu. Bunu Azər müəllimin özündən də soruşa bilərsiz. Bəlkə də komandada məşqçilər heyətindən ən yaxşı münasibətim Azər müəllimlə olub. Klubdan ayrılmağının fərqi yoxdu. Hətta klubdan ayrılandan sonra da 3-4 dəfə görüşmüşük. Həm telefonla danışmışıq, həm də üzbəüz söhbətləşmişik. Dediyim kimi, futbol cəhətdən heç danışmağıma ehtiyac yoxdu. Çünki əsas insanlıqdı. Azər müəllim də insan kimi insandı.

- Yeni baş məşqçiniz Elmar Baxşıyevin idarəçiliyi necədi? Öz oyun fəlsəfəsini sizlərə aşılaya bilib?
- Elmar Baxşıyevin idarəçiliyinə qiymət verə bilmərəm. Bu barədə fikir bildirməyim düzgün olmaz. Hər bir məşqçi kimi, onun da bir fəlsəfəsi var. Bu komandada olacağım sonuncu günə qədər də onun qoyduğu qayda-qanunlara uyğun hərəkət edəcəm. Oyun fəlsəfəsi deyəndə ki, doğrusu, Elmar müəllimin komandaya gəlişindən sonra o qədər də çox vaxtımız olmadı. Ancaq öz oyun sistemində nə istədiyini məşqlərdə bizə göstərir. Biz də öz növbəmizdə çalışırıq ki, onun tapşırıqlarına əməl edək.

- Son vaxtlar adın daim transfer xəbərlərində hallanır, həm yerli, həm də başqa ölkələrdən olan klubların maraq dairəsində olduğun deyilir. Komandadakı taleyinlə bağlı qərar vermisən?
- Yalan məlumat deyil, həqiqətən də təkliflər var idi. Sadəcə, “Araz-Naxçıvan”la müqaviləm var. Bu üzdən də mənim tərəfimdən bu mövzu böyüdülmədi. Həm ölkədən, həm də xaricdən təkliflər oldu. Lakin müqaviləmə və komandamın indiki durumuna görə maraqlanmadım. Taleyimlə bağlı hələ ki konkret qərar verməmişəm. Mövsümün yekunlaşmasını gözləyirəm. Ondan sonra gələcək karyeramla bağlı düşünüb-daşınıb qərar verəcəm. İndiki halda ani qərar vermək istəmirəm. Yəni hara olur-olsun, inşallah, xeyirlisi nədisə, həmin qərarı da verəcəm.

- “Araz-Naxçıvan”la müqaviləni yeniləyəcəksən, yoxsa təklifləri dəyərləndirəcəksən?
- Həqiqətən də necə olacağını bilmirəm. Üzümüzə gələn ayda boşluqdan istifadə edərək, fikirləşib qərarımı verəcəm.

- Hazırda həm mərkəzi Avropada, həm də qardaş Türkiyədə legioner həyatı yaşayan futbolçularımız var. Legioner seçimi etsəydin, hansı ölkəni seçərdin?
- Türkiyə və ya Avropa - fərq eləmir. Yəni harda daha çox inkişaf edə biləcəyəmsə, hansı ölkənin şərtləri məni qane edirsə, ümumiyyətlə, yaşamaq üçün hara mənə daha rahatdısa, seçimimi də bu yöndə edəcəm. Belə baxanda Türkiyə də Avropa sayılır. Qeyd etdiyim kimi, sırf ad olaraq Türkiyə və ya Avropa seçimi etməyəcəm. Sadaladığım meyarlara uyğun olan seçimi dəyərləndirəcəm.

KAMAL SƏFƏR