''Qalatasaray''a məxsus olan futbolçu AÇ-dən kənar qala bilər
Müqavilə ilə ''Qalatasaray''a məxsus olan, icarə əsasında ''Aston Villa''nın şərəfini qoruyan Nikolo Zanyolodan bəd xəbər gəlib.
İtaliyalı yarımmüdafiəçi son turda ''Liverpul''a qarşı oyunda zədə alıb. ''Corriere dello Sport''un xəbərinə görə tibbi müayinədən sonra futbolçunun ayağında kiçik qırıq aşkarlanıb. Onun ən azı 1 ay topa toxuna bilməyəcəyi gözlənilir. Avropa Çempionatının startına 1 aydan da az vaxt qaldığını nəzərə alsaq, bu futbolçunun qitə turnirini buraxması ehtimalı böyükdü. Bunu İtaliya yığmasının baş məşqçisi Luçano Spalletti də təsdiqləyib:
''Zanyolo ilə danışdım. Tezliklə meydana qayıtması çətin görünür. Onun AÇ-də iştirakı sual altındadı''.
Amma bəzi mənbələr 24 yaşlı futbolçunun AÇ-yə aparılacağı təqdirdə oynamaq ehtimalının olacağını qeyd edir. Ulduz futbolçu öz səhifəsində '
'həm ''Aston Villa'', həm də türkiyəli fanatlara dəstəkləri üçün təşəkkür edirəm. Daha güclü şəkildə dönmək üçün indidən səbirsizlənirəm''
paylaşımını edib. Qeyd edək ki, Birmingem təmsilçisi birillik icarə haqqı olaraq ''Cim-Bom''a 5 milyon avro ödəyib. Onların daha 22,5 milyon avro ödəyərək Zanyolonu daimi əsasda transfer etmək hüququ var. Futbolçu bu mövsüm premyer-liqada 30 oyuna çıxsaydı, bu şərt avtomatik qüvvəyə minəcəkdi. Amma ''Aston Villa''nın Zanyolonu daimi əsasda transfer etmək niyyəti yoxdu. Böyük ümidlərlə İngiltərəyə yollanan istedadlı futbolçu ''Aston Villa''da ümidləri doğrulda bilmədi. O, cari mövsüm 25-i premyer-liqada olmaqla 39 rəsmi oyuna çıxaraq cəmi 3 qol vurub. Bu futbolçunun bu yay ''Qalatasaray''a qayıdacağı gözlənilir.
ƏLİ
