Bu yay tarixinin ən güclü heyətlərindən birini quran “Qalatasaray” mövsümə yetərincə yaxşı start verib.

“Football-plus.az” xəbər verir ki, İstanbul nəhənginin həm superliqada, həm də Çemionlar Liqasında işləri qaydasında gedir. Yeni transferlərin böyük əksəriyyəti artıq komandaya fayda verməyə başlayıb. İstisna kimi yalnız Tanqi Ndombele ilə Sedrik Bakambunu göstərmək olar. Nadombelenin durumunu anlayışla qarşılamaq olar. O, Türkiyəyə yaxşı durumda gəlməmişdi və hələ də optimal formaya düşməyib. Bakambunun durumu isə fərqlidi. O, İstanbula ayaq basarkən fiziki cəhətdən heç bir problemi yox idi. Sadəcə, Bakambu Mauro İkardinin kölgəsində qalıb. 32 yaşlı konqolu forvard şans qazandığı 227 dəqiqə ərzində hesabına nə qol yazıb, nə də məhsuldar ötürmə. Məsələn, digər hücumçu Xəlil Dərvişoğlu Bakambudan təxminən iki dəfə az – 132 dəqiqə şans qazansa da, artıq 2 qol vurub. Əslində Okan Buruk Bakambunun məşqlərdəki performansından razıdı. Amma rəsmi matçlarda bu futbolçu istəniləni vermir. Ona görə də onun qışda komandadan ayrıla biləcəyi haqda şayiələr yayılıb. İlk dövrənin sonuna qədər Bakambunun şans qazanacağı oyunlarda göstərəcəyi performansdan çox şey asılı olacaq. Bu durum ötən mövsüm Haris Seferoviçin başına gələnləri xatırladır. İsveçrəli forvard 2022-nin yayında böyük ümidlərlə transfer olunmuşdu. Amma superliqada heç cür qol vura bilməyincə və fürsətləri boşa verincə qış transfer dönəmində “Selta”ya yollandı. “Qalatasaray”da yalnız Türkiyə kubokunda 2 qol vuran Seferoviç hazırda BƏƏ təmsilçisi “Əl-Vəsl”in şərəfini qoruyur.

Yeri gəlmişkən, Türkiyə mətbuatında Yunus Akgünün “Lester”lə müqaviləsinin detalları açıqlanıb. Bilindiyi kimi, “Qalatasaray”ın öz yetirməsi olan və müqavilə ilə bu kluba məxsus olan istedadlı futbolçu Türkiyənin Latviyanı məğlub etdiyi qarşılaşmada oyunu ilə diqqəti çəkib və qələbənin əsasını qoyub. Bu oyundan sonra “Qalatasaray” fanatları onun müqaviləsinin detalları ilə maraqlanmağa başlayıblar. “Cim-Bom” 23 yaşlı vingeri 500 min avro qarşılığında çempionşip təmsilçisi “Lester”ə icarəyə verib. Müqavilədəki xüsusi maddəyə əsasən Yunus 25 rəsmi oyuna çıxacağı təqdirdə “tülkülər” məcburən 9 milyon avro ödəyərək onu daimi əsasda transfer etməli olacaqlar. Amma bəzi mənbələr vurğulayır ki, bu şərt qarşılanmasa belə, “Lester” istədiyi təqdirdə 9 milyon avroya türkiyəlini transfer edə bilər. Yunus Akgün hələ ki bu mövsüm İngiltərə təmsilçisində 8 rəsmi oyuna çıxaraq hesabına iki məhsuldar ötürmə yazıb. “Lester” hazırda çempionşipdə turnir cədvəlinə başçılıq edir və premyer-liqaya qayıtmağa əsas namizəd sayılır.