“Qəbələ” növbəti mövsümdən etibarən 1-ci liqada çıxış edəcəyi dəqiqləşəndən, yəni 32-ci turdan sonra keçirdiyi hər iki oyundan qələbə ilə ayrılmağı bacarmışdı.
“Qırmızı-qaralar” bu görüşdə də qələbəyə köklənmişdi. Həm də bu, “Qəbələ”nin premyer-liqada doğma azarkeşlər önündə keçirdiyi son matç idi. Elmar Baxşıyev isə ilk dəfə bu stadiona rəqibin baş məşqçisi kimi gəlirdi. O da yeni komandasında özünü sübut etməkdən ötrü “qırmızı-qaralar”ı məğlub etməyə çalışacaqdı.

İlk təhlükəli vəziyyəti Sxadadzenin yetirmələri yaratdı. 3-cü dəqiqədə Eşqin sağ cinahdan cərimə meydançası kənarından sol ayağıyla qapıya qüvvətli zərbə endirdi. Qokiper bu zərbəni dəf etsə də, ardınca Emilin ilk zərbəsini Kadiri blokladı və yenə Emil ikinci cəhddə topu “çərçivə”yə göndərə bildi. Lakin bu Kristian üçün heç bir çətinlik yaratmadı. Moldovalı qapıçı diqqətli oynayaraq qəbələlilərin ardıcıl iki zərbəsinin qarşısını aldı. Bir qədər sonra meydan sahibləri növbəti dəfə uzaq məsafədən qapıya düşməyə çalışdı. Ayzayanın qüvvətli zərbəsi yetərincə, təhlükəli alınsa da az fərqlə qapıdan aralı keçdi. “Qırmızı-qaralar” ilk dəqiqələrdən etibarən meydanda daha fəal təsir bağışlayırdı. 15-ci dəqiqədə Sxadadzenin yetirmələri daha bir qol vəziyyətini dəyərləndirə bilmədi. Allaşın müdafiənin arxasına göndərdiyi ağıl dolu ötürməni Klesio qola çevirə bilmədi. Mozambikli futbolçu təkbətək mübarizədə topu qapıçının üzərinə göndərdi. Klesio 7 dəqiqə sonra daha bir fürsəti boşa verdi. Səfərovun ideal ara ötürməsindən sonra qapıçını da geridə qoyan 29 yaşlı futbolçunun vurduğu zərbə qapı torunu yandan silkələdi. Qəbələ təmsilçisi 44-cü dəqiqədə daha bir qol fürsətindən yararlana bilmədi. Eşqinin qapı önünə yerlə ötürməsini Xalayla boşa verdi. Bu müddət ərzində Muxtar Respublika təmsilçisi, sadəcə, meydanda yaşananlara tamaşa etdi. Nəhayət, 50-ci dəqiqədə “Qəbələ” Elmar Baxşıyevin rəhbərlik etdiyi komandanın müqavimətini qıra bildi. Bu dəfə də Emil baxımlı ötürməylə yadda qaldı. Gənc oyunçunun müdafiənin arxasına göndərdiyi topu Allaş başla qapı önündə boş qalan Xalaylaya ötürdü. İsrailli futbolçu bu dəfə “çərçivə”dən yayınmadı – 1:0. 70-ci dəqiqədə Baxşıyevin yetirmələri ilk real təhlükəli vəziyyəti yaratdı. Nəsirlinin qapı önünə ötürməsi zamanı Zamiq hava mübarizəsində Eşqinə qalib gəlsə də, başla zərbəsi qeyri-dəqiq oldu. 80-ci dəqiqədə Allaş yüzfaizlik qol imkanını boşa verdi. Belə ki, Zamiqin qolkiperə yanlış ötürməsi zamanı topu ələ keçirən Əyyubun zərbəsi qapı tirinin üstündən auta çıxdı. Cəmi 1 dəqiqə sonra Allaş ara ötürməsiylə komanda yoldaşı Bileli Avramla üzbəüz qoydu. Fəqət oyunçunun zərbəsi toru yandan silkələdi. 87-ci dəqiqədə Afrilonun müdafiənin arxasına ötürməsindən sonra topla qovuşan Allaş Avramla təkbətək mübarizədən qalib ayrıldı – 2:0. Oyunun əsas vaxtına artırılmış əlavə 3-cü dəqiqədə Vanderson uzaq məsafədən “çərçivə”ni düzgün hədəfə aldı. Lakin Rəşad diqqətli oynadı.

Beləliklə, Elmar Baxşıyev sabiq komandasına qarşı ilk görüşdən məğlub ayrıldı. Sxadadze isə “Qəbələ” ilə ardıcıl qələbələrinin sayını 3-ə çatdırdı.

Gözdən qaçmadı
* Hər oyunda adət etdiyimiz “Şəhidlər ölməz, vətən bölünməz” şüarı bu görüşdə səsləndirilmədi.
* Allaş qol sevincini Sxadadze ilə bölüşdü. Oyunçu əvəzlənəndən sonra da Kaxaber meydançanı göstərərək, Allaşa nəyisə izah etdi.
* “Red-Black Army” tribunada olsa da, “Sektor-85” komandasını tək qoydu.

KAMAL SƏFƏR