Çempion bəlli olsa da, premyer-liqada rəqabət zəifləmir.

Belə ki, bəzi komandalar 2-ci yer, bəziləri isə elitada qalmaq üçün çalışır. “Zirə” – “Qəbələ” oyunu da bu mənada xüsusi əhəmiyyət daşıyırdı. Tərəflərin 4 gün öncə elə bu stadionda keçirilən kubok matçından “qartallar” qalib ayrılsa da, bu dəfə “qırmızı-qaralar”ın geridönüş edəcəyinə ümid böyük idi. Qəbələli azarkeşlərin kubok matçında yox, bu oyunda iştirak etməsi “qırmızı-qaralar”ı daha da ruhlandırmalıydı.

Oyunda hesab tez açıldı. Artıq 4-cü dəqiqədə Qismətin qapı qarşısına ötürməsi zamanı müdafiəçilərin yanlış mövqe seçimindən və diqqətsizliyindən yararlanan Rəhim topu tora qovuşdurdu – 1:0. Bir qədər sonra ilk qolun vurulduğu kombinasiyası başladan Utziq bu dəfə akrobatik zərbə ilə “çərçivə”ni nişan aldı. Amma top düz Atanqanaın üzərinə getdi, onun üçün heç bir problem yaratmadı. Bundan sonra təzyiqi artıran meydan sahibləri fəallıq nümayiş etdirirdi. 25-ci dəqiqədə fərq artdı. Salifu sağ cinahda rəqibləri aldadıb, cərimə meydançasındakı Rəhimə ara ötürməsi verərək futbolçunu qapıçıyla üzbəüz qoydu. Sadıxov isə qapıya zərbə endirmək əvəzinə daban ötürməsiylə topu Nuriyevə buraxdı. Hücumun davamında Ceyhunun qapıya göndərdiyi topun qapıya daxil olmasına Nicat mane olsa da, Utziqin başla vurduğu zərbənin qarşısını isə ala bilmədi – 2:0. Sxadadzenin komandası hücuma atılaraq, aradakı fərqi əritməyə çalışırdı. Belədə “Zirə”nin əks-hücumları daha təhlükəli alınırdı. Təsadüfi deyil ki, 27-ci dəqiqədə fərq darmadağın həddinə çatdı. Oyunun ən fəallarından olan, sanki sabiq komandasının qəsdinə duran Utziq Nuriyevə ötürmə verdi. Davamında oyunçuların qısa paslaşmalarının ardından hələ də tam şəkildə müdafiədə yerləşə bilməyən “Qəbələ” üçüncü dəfə meydanın mərkəzinə dəvət olundu – 3:0. 31-ci dəqiqədə qonaqlar “Zirə”nin qapısı önündə ilk dəfə təhlükəli vəziyyət yaratdı. Allaşın cərimə zərbəsindən rəqib meydançasına hava ötürməsindən sonra Xalaylanın baş zərbəsi qapıdan azca aralı keçdi. Az sonra “qartallar”ın növbəti təhlükəli vəziyyətinə şahid olduq. Sadəcə, Rəhimin qüvvətli zərbəsini Atanqana dəf etdi.

2-ci hissədə qonaqlar nisbətən fəallaşdı. 51-ci dəqiqədə “qırmızı-qaralar” rəqib qapısına ilk zərbəni endirdi. Bilelin cərimə meydançasına hava ötürməsini Tetteh qüvvətli olmayan baş zərbəsiylə qapıya göndərdi. Lakin Tyaqo çətinlik çəkmədən topu tutdu. 57-ci dəqiqədə əks-hücuma çıxan “Zirə” tablodakı rəqəmlərdən birini 4-ə çevirdi. Utziq meydançanın mərkəzində “Qəbələ” oyunçularının əhatəsindən çıxaraq, topu sol cinahla irəliləyən Fuada ötürdü. Davamında isə futbolçu Atanqanayla mübarizədən qalib ayrıldı – 4:0. Qəbələlilər meydanı qol vurmadan tərk etmək istəmirdi. 70-ci dəqiqədə Klesionun yerinə yetirdiyi cərimə zərbəsi zamanı top “canlı sədd”ə dəyib qapıdan azca aralı keçdi. Beləliklə, “Qəbələ” bu tur da xal itirməklə ən yaxın rəqibi “Kəpəz” ilə aradakı xal fərqininin 14-ə çatması ilə barışdı. “Zirə” isə vacib qələbə sayəsində turnir cədvəlinin 2-ci pilləsinə yüksəldi.

Gözdən qaçmadı
* “Red-Black Army” tribunaya “qartallar”dan əvvəl gəldi və sona qədər komandaya fəal şəkildə dəstək verdi.
* Urfan Abbasov epizodların birində topun yan xətdən çıxdığını deyən hakimə “hara çıxdı? Gözünüz elə görür” dedi.
* Utziq keçmiş komandasına qapısına vurduğu qola görə sevincini gizlətmədi.

KAMAL SƏFƏR