İkihəftəlik fasilədən sonra Misli premyer-liqasında 4-cü dövrə start götürdü.

28-ci turun açılış matçında elitada qalmaq uğrunda çalışan “Qəbələ” 2-ci yerə can atan “Neftçi”ni qəbul etdi. Hər iki komanda qələbəyə böyük ehtiyac duyurdu. Çünki “qırmızı-qaralar” ən yaxın rəqibi “Kəpəz”lə aradakı 11 xal fərqini əritmək, “ağ-qaralar” isə qələbə qazanıb 2-ci pillədə qərarlaşmaq istəyirdi. Nəzərə alaq ki, mövsümün sonuna az qalır və indi hər xal qızıl qiymətindədi. Beləliklə, maraqla gözlənilən oyunu izləmək üçün Qəbələyə yollandım.
Qazon əla vəziyyətdə, hava inanılmaz dərəcədə yaxşı idi. İndi isə oyuna keçək.

Əslində oyunun əvvəli heç də gözləntiləri doğrultmadı. Belə ki, meydanda gərgin, qarşılıqlı mübarizənin şahidi olacağımızı düşünsək də, ilk dəqiqələr bu təəssüratı yaratmadı. Sadəcə, tərəflərin kəsərsiz hücumlarına və mənasız top itkilərinə şahidlik etdik. İlk real qol vəziyyəti meydan sahiblərindən gəldi. 20-ci dəqiqədə Xalaylanın qapı qarşısına ötürməsini Urfan başla qapıya göndərdi. Lakin Rza topun tora qovuşmasına imkan vermədi. “Qəbələ”nin topa nəzarəti fonunda keçən matçda hesabı qonaqlar açdı. Rəqibin müdafiədəki səhlənkarlığını görən Ozobiç topu boş mövqedə olan Lebona ötürdü. Kilan topu sağa çəkərək “çərçivə”ni dəqiq nişan aldı - 0:1. İlk yarıya artırılan dəqiqədə Xalayla qol vursa da, ofsaydda idi.

İkinci hissə isə ilk yarı ilə müqayisədə daha canlı keçdi. 61-ci dəqiqədə Sxadadzenin komandası hesabı bərabərləşdirməyə yaxın oldu. Allaşın standart vəziyyətdən rəqibin cərimə meydançasına asmasını bu dəfə Xalayla qapıya göndərsə də, qolkiper gözəl seyvlə zərbənin qolla nəticələnməsinə mane oldu. Bir qədər sonra “qırmızı-qaralar” yenə fərqlənməyə yaxın idi. Lakin Afrikonun başla zərbəsi qeyri-dəqiq oldu. Təzyiqi artıran meydan sahibləri “ağ-qaralar”ı daha diqqətli oynamağa məcbur edirdi. 83-cü dəqiqədə Raufun sağ cinahdan irəliləyərək cərimə meydançasına yerlə göndərdiyi ötürməni Bauk dəyərləndirməliydi. Mozambiklinin zərbəsi təhlükəli olsa da, qapıdan azca aralı keçdi. Matçın sonlarına yaxın bəzi təhlükəli vəziyyətlərə şahidlik etsək də, “Qəbələ” heç cür məğlubiyyətdən yaxa qurtara bilmədi. Beləliklə, “ağ-qaralar” minimal hesablı qələbə sayəsində turnir cədvəlində 2-ci pilləyə yüksəldi. “Qəbələ”nin isə elitadan düşmək ehtimalı gündən-günə artır. “Qırmızı-qaralar” Sxadadzenin rəhbərliyi altında keçirdiyi ardıcıl 5-ci oyunda da qələbəyə həsrət qaldı.

Gözdən qaçmadı
* Oyundan əvvəl PFL-in texniki-idman direktoru Elgiz Abbasov “Qəbələ”nin futbolçusu Ülvi İsgəndərova fevral üçün nəzərdə tutulan “ayın qolu” mükafatını təqdim etdi.
* Rauf Hüseynli ilk dəqiqələrdə çox inamsız təsir bağışlayırdı, hətta epizodlardan birində topu saxlaya bilmədiyindən azarkeşlərdən biri ona “Rauf, nə olub sənə?” dedi.
* “Qəbələ”nin kapitanı Asif Məmmədov meydandan kənarda futbolçulara dəstək olur, göstərişlər verirdi.
* “Red-Black Army” azarkeş qrupu çox passiv idi.
* Urfan Abbasov əvəzlənərkən ehtiyat oyunçular skamyasına yox, birbaşa paltardəyişmə otağına yollandı.

KAMAL SƏFƏR