Bir tərəfdə son 6 oyunda qələbə qazana bilməyən Naxçıvan təmsilçisi, digər tərəfdə isə sonuncu turda “Qarabağ”ın darmadağın etdiyi və elitada qalmaq uğrunda “Qəbələ” ilə çarpıan Gəncə təmsilçisi..


Təbii ki, hər biri qələbəyə köklənmişdi. Həm də “sarı-göylər” qalib gələcəyi təqdirdə “qırmızı-ağlar”la aradakı xal fərqini 2-yə endirəcəkdi. Bu səbəblərdən oyunun gərgin mübarizə şəraitində keçəcəyini təxmin etmək heç də çətin deyildi. Artıq 1-ci dəqiqədə gəncəlilər rəqibin qapısı önündə qarışıqlıq yarada bildi. İlk təhlükəli vəziyyət də məhz “sarı-göylər”dən gəldi. Matenin müdafiənin arxasına ötürməsindən sonra topu ələ keçirən Amil iti bucaq altından etdiyi qüvvətli zərbəylə qapını yoxladı. Amma Avram ayıq-sayıqlığı əldən vermədi. Getdikcə nominal meydan sahibləri də fəallaşırdı. Muxtar Respublika təmsilçisi meydanın rəqibə aid hissəsində pressinq edərək gəncəliləri səhvə məcbur etməyə çalışırdı. Bağırovun yetirmələri yüksək təzyiq sayəsində istəyinə də nail olurdu. 16-cı dəqiqədə Kuzmanoviç qarşısında “Kəpəz” futbolçularının olmasına rəğmən, cərimə meydançasının kənarından sağ ayaqla vurduğu zərbə ilə topu qapının “altılığ”ına göndərməyi bacardı – 1:0. Hissənin sonuna qədər isə heç bir real qol vəziyyətinə şahidlik etmədik. Sadəcə, 44-cü dəqiqədə naxçıvanlılar növbəti dəfə fərqlənməyə yaxın olsa da, Orxan imkanı boşa verdi. Az sonra yan xətt hakiminin ofsayd bayrağı havaya qalxdı. 2-ci hissəyə qonaqlar daha istəkli başladı. Şükürovun yetirmələri bərabərlik qolunu vurmaq üçün rəqib üzərində təzyiqi artırdı. Elə bu yarıda da ilk təhlükəni “Kəpəz” yaratdı. Bu dəfə Falın cərimə zərbəsindən qapı qarşısına göndərdiyi ötürmə Manafovun yanlış toxunuşu nəticəsində Amilin önündə qaldı. Yunanov qapını nişan alsa da, qolkiper zərbəni dəf etdi. Bir qədər sonra Kuzmanoviç ilk qoldakı kimi yenə sol cinahdan rəqibin cərimə meydançası kənarından qapını yoxladı. Lakin onun vuruşu qapıdan aralı keçdi. 2-ci hissədə qonaqların aqressivliyi açıq-aşkar görünürdü. Aramsız hücumlar 54-cü dəqiqədə bərabərlik qolunu gətirdi. “Kəpəz”in ən məhsuldar futbolçusu Martins cərimə meydançası kənarından qapının uzaq küncünə baxımlı zərbə vurdu – 1:1. “Qırmızı-ağlar” özünə gəlməmiş qapısında 2-ci qolu gördü. Bu dəfə Mate sağ cinahla irəliləyərək sol ayağıyla uzaq küncü dəqiq nişan aldı – 1:2. Naxçıvanlılar bundan sonra hesabı bərabərləşdirmək üçün bütün gücüylə irəli atıldı. 66-cı dəqiqədə Vandersonun ötürməsindən sonra “Kəpəz” müdafiəçilərinin nəzarətindən yayınan Orxan topu saxlamadan qapıya göndərsə də, İqor diqqətli oynayaraq zərbəni uzaqlaşdırdı. Davamında isə Kuzmanoviç yaxın məsafədən fərqlənə bilmədi. Yenə qapıçı baxımlı seyvlə yadda qaldı. Bir qədər sonra İsmayıl uzaq məsafədən “çərçivə”ni yoxladı. Bu dəfə də qolkiper çətinlik çəkmədi. 82-ci dəqiqədə Vadimin ara ötürməsini Tural dəyərləndirə bilmədi. “Araz-Naxçıvan”ın oyunçuları müdafiəni yarmağı bacarsa da, qapıçını keçə bilmirdi. Məğlubiyyətdən yaxa qurtarmağa çalışan Bağırovun yetirmələri var gücüylə irəli atılmışdı. Buna görə də müdafiədə yaranan boşluqlardan qonaqlar istifadə etməyə çalışırdı. Uzatma dəqiqələrində belə boşluqların birində Camal ağıldolu ara ötürməsiylə komanda yoldaşı Rüfəti qapıçıyla üzbəüz qoydu. Fəqət futbolçu baxımlı kombinasiyanı qolla tamamlaya bilmədi. Naxçıvan təmsilçisi son dəqiqələrdə nə qədər çalışsa da, məğlubiyyətdən xilas ola bilmədi. Beləliklə, Azər Bağırovun komandası ardıcıl 7-ci çempionat oyununda qələbəyə həsrət qaldı. “Kəpəz” isə “Qəbələ” ilə xal fərqini 14-ə çatdırmaqla yanaşı, naxçıvanlılarla fərqi də 2-yə endirdi.

Gözdən qaçmadı
* “Xəmsə”nin azarkeşləri “Sektor-85”in azarkeşlərindən daha az idi. “Sektor-85” fəal şəkildə komandaya dəstək oldu.
* Martins Junior bu mövsüm 4-cü sarı vərəqəsini alaraq cəzalı duruma düşdü.

KAMAL SƏFƏR