“Qəbələ” premyer-liqada son günlərini yaşayır.

AFFA-nın “qırmızı-qaralar”a güzəşt etməməsi, yəni İcraiyyə Komitəsinin klub sayının artırılması ilə bağlı qərar verməməsi olan-qalan ümidləri də puç etdi. Bölgə təmsilçisi son iki turda qələbə qazanmasına baxmayaraq, birinci liqaya yuvarlanmaqdadı. Futbol ictimaiyyətinin bəzi nümayəndələri “Qəbələ”nin növbəti mövsüm də premyer-liqada mübarizə aparacağını düşünsə də, belə olmadı. Təbii, indiki məqamda AFFA-nı qınamağa da dəyməz.

Sirr deyil ki, əksər futbolçular, xüsusən də legionerlər indi Qəbələdə gün sayır. Belə ki, 1-ci liqaya düşən klub büdcə azlığına və başqa səbəblərə görə legionerlərlə sağollaşacaq. Hətta bəzilərinin adı premyer-liqanın başqa klubları ilə hallanır. Yerli futbolçuların əksəriyyətinin taleyini də indidən təxmin etmək olar. Ötən yaydan “Qəbələ” ilə müqaviləsi olan Bilel Auaşeriyanın isə “Zirə”nin maraq dairəsində olduğu deyilir. 30 yaşlı fransalı ilə ilkin danışıqların aparıldıği da iddia olunur. Bəs Bilelin “Qəbələ”dəki taleyi necə olacaq?

- AFFA İcraiyyə Komitəsinin klubun xeyrinə qərar verəcəyini gözləyirdin?
- Düzünü desəm, iclasla bağlı heç bir gözləntim yox idi. İdarə edə bilmədiyim şeylərdən heç nə gözləmirəm. Qərarları onlar qəbul edir və biz də sonda onları qəbul etməliyik.

- AFFA “Qəbələ”ni elitada saxlamalıydı, yoxsa idman prinsiplərini pozmamaq daha ədalətli qərardı?
- İdman prinsipinə hörmət etdilər və belə də olmalıdı. Mövsümü sonuncu pillədə başa vururuq, buna görə də idman prinsiplərinə əməl etsək, aşağı liqaya düşəcəyik. İndi “Qəbələ”nin Azərbaycan futbolu üçün nə ifadə etdiyinə, malik olduğu struktura, akademiyaya gəlincə, 12 komandalı çempionat olsaydı, başa düşmək olar. Hər iki qərarın özünə görə dəlilləri var.

- Komandanın aşağı liqaya düşməsi hansı nəticələrə səbəb ola bilər?
- Klubla bağlı olan hər kəs üçün nəticəsi var. İlk növbədə “Qəbələ” azarkeşləri, klubu həqiqətən sevən, hər yerdə dəstəkləyən insanlar üçün...

- Çoxları hesab edir ki, komandanın bu vəziyyətə düşməsinin əsas səbəbi ötən yay heyətə cəlb olunan futbolçuların özlərini sübut etməməsidi. Sən də onların arasındasan. Bu fikirlə razısanmı və bu yerdə olduğunuz üçün özünü nə qədər günahkar sayırsan?
- Hər kəs fikrini bildirməkdə azaddı. Futbol duyğular oyunudu, bəzən qalib gəlirsən, bəzən uduzursan. Bəli, ötən yay gəldim və bu mövsümü sonuncu bitirən komandanın bir hissəsiyəm. Ona görə mən də məsuliyyət daşıyır, bunu üzərimə götürürəm. Bir futbolçu üçün mövsümü sonuncu yerdə bitirmək çox çətindi.

- “Qəbələ” növbəti mövsüm birinci liqadan premyer-liqaya qayıda bilər?
- Bunu klubda qərar qəbul edən insanlardan soruşmaq lazımdı. Məsul şəxslər bu suala cavab vermək qabiliyyətinə malikdi.

- Kaxaber Sxadadze oyunsonrası çıxışlarında, adətən, futbolçuları günahlandırır. Bəs özü günahsızdı?
- O, bura komandaya kömək etmək üçün gəldi. Deyə bilərəm ki, daha yaxşı nəticələr əldə etmək üçün tam qərarlı idi. Amma alınmadı. Çox şey demək olar. Sadəcə, alınmadı.

- AFFA “Qəbələ”yə əlavə vəsait ayıracağını bildirdi. Yəni klubda qalıb oynayacaqsan?
- Düzünü desəm, bu barədə heç nə bilmirəm, nə olacağını görəcəyik...

- Deyilənə görə, “Zirə” sənlə danışıqlar aparır...
- Hazırda hələ də “Qəbələ”nin oyunçusuyam, qarşıda daha iki oyun var, diqqətimi ona yönəldirəm. Gələcəyim tezliklə müəyyənləşəcək. Yəni hələ də “Qəbələ”nin müqaviləli futbolçusuyam.

RÖYANƏ OĞUZ