“Bəzi media qurumları “Şamaxı” haqda elə məlumatlar yayır ki, mən özüm də şoka düşürəm. Bilmirəm ki, bu uydurma söhbətlər hardan ağıllarına gəlir... “Şamaxı”nın sonu deyil. İstər birinci divizionda, istərsə də premyer-liqada mübarizə aparmağa hazırıq. Hansı liqada çıxış edəcəyimizi AFFA İcraiyyə Komitəsinin iclasından sonra öyrənəcəyik. Yekun qərar açıqlanandan sonra növbəti mövsümün hazırlığına başlayacağıq. Heyətin dağıldığını yazırlar. Guya hərə bir tərəfə qaçır. Elə şey yoxdu. İcarəyə götürdüyümüz futbolçular var idi ki, klublarına döndülər. Cəlal Hüseynov “Zirə”yə, Kamran Quliyev “Sabah”a, Nihat Quliyev “Qarabağ”a, Asim Əlizadə isə “Neftçi”yə qayıtdı. Bundan başqa, Kamal Mirzəyev, Elçin Rəhimli, İbrahim Aslanlı, Elmir Məmmədov və Amil Yunanovla müqaviləmizin müddəti başa çatıb. Onlar artıq azad agent statusu daşıyır. Dediyim kimi, gözləmə mövqeyindəyik. Klub nümayəndələri istirahətdədi. AFFA-nın yekun qərarından sonra baş məşqçi Vüqar Əsgərli və futbolçular ilə danışacağıq. Kimləsə müqaviləni yeniləməmişiksə, bu hər şeyin sonu deyil. Gedənlər qayıda bilər. Yeni futbolçular da transfer etmək istəyirik. Bütün cavabsız suallara klubdaxili iclasdan sonra aydınlıq gələcək”.