Bilindiyi kimi, futbol üzrə ölkə çempionatının 2023/24 mövsümündə elitanı tərk edəcək komanda “Qəbələ”di. Belədə klubun növbəti mövsüm üçün hansı planları qurması maraqlıdı.

Bu mövzuda ətraflı məlumat almaq üçün “qırmızı-qaralar”ın idman direktoru Səbuhi Səfiyarlıyla söhbətləşdik. Onun “Football-plus.az”a qısa müsahibəsini təqdim edirik.

– “Qəbələ”nin mövsümü sonuncu pillədə bitirəcəyi bəllidi. Bununla yanaşı, komanda sayının artırılacağı deyildiyindən premyer-liqanı tərk etmək yönündə ehtimallar haçalanır. Bu, planlarınıza necə təsir edir?
– İddialar söz-söhbət səviyyəsindədi. Peşəkar klub buna uyğun addım ata bilməz. Rəsmi qərarlar əsassında davranmalıyıq. Növbəti mövsüm üçün 1-ci liqaya hazırlıq görürük. Dəyişiklik olsa, onda planlarımız dəyişəcək.

– Deyilənə görə, artıq “Qəbələ-2”nin taleyi həll olunub. Komanda dağılacaq. Bəs futbolçuların aqibəti necə olacaq?
– Bəllidi ki, 1-ci liqa komandasının əvəzedicisi olmur. Bu, normal prosesdi. Futbolçularla danışıq aparacağıq. Bəziləri əsas komandaya cəlb olunacaqsa, bəziləri də icarəyə veriləcək. Qalanlarının taleyini hələ bilmirik.

– Premyer-liqadan düşmək AFFA tərəfindən ayrılan maliyyənin 10 dəfə azalması deməkdi. Maliyyə probleminin yaranmaması üçün hansı tədbirlər görüləcək?
– Sponsor sayının artırılması yönündə çalışmalara başlamışıq. Görüşlər keçirilir. Bununla yanaşı, məsələn, 6 yox, 2 meydançadan istifadə edəcəyik. Biri məşqlərin, biri də oyunların keçirilməsi üçün. Digərlərini icarəyə verməyi planlaşdırırıq. Başqa layihələr də olacaq ki, bunu indi açıqlamaq doğru olmaz. Əlimizdən gələni edəcəyik ki, maddi çətinliklə üzləşməyək.

– Sonda indiki heyətin gələcəyi maraqlıdı...
– Müəyyən şərtlərlə razılaşdığımız halda, bizə lazım olan yerli futbolçuları komandada saxlamağa çalışacağıq. Legionerlərə gəlincə, elitada qalsaq da, əksəri yola salınacaqdı.

KƏNAN BAHADIR