Yayda “Qəbələ"də “yarpaq tökümü” olacaq - Səbuhi Səfiyarlı: “Özləri də başa düşür ki, biz o maaşı verə bilmərik”
“Qəbələ”nin sonuncu olacağı aydındı.
Sirr deyil ki, klub aşağı dəstənin biraddımlığındadı. Yeganə çıxış yolu AFFA-nın çempionatın formatında dəyişiklik etməsidi ki, buna da nəinki rəhbərlik, komanda üzvləri də inanmır. Belədə rəhbərlik aşağı liqa üçün tədbirlər görməyə başlayıb. Azarkeşlər zəif nəticə göstərən futbolçulardan, xüsusilə də bəzi legionerlərdən kəskin narazıdı.
Hazırda heyətdə mövsümün sonunda müqavilə müddəti bitəcək futbolçular var. Onsuz da ötən mövsüm heyətdə olan aparıcı futbolçuların çoxunu itirən “Qəbələ” bu yay da radikal dəyişikliyə məcburdu. Bəs “qırmızı-qaralar”la yayda sağollaşacaq futbolçular kimlərdi?
Heyətdəki 12 əcnəbidən ikisi bir ay əvvəl yola salındı. İsrailli futbolçular Gilad Abramovla Feras Abu Akal müəyyən şərtlər qarşılığında ölkələrinə qayıtdılar. Qalan 10 legionerdən beşinin anlaşması bu ayın sonuna qədərdi. Bunlar Əyyub Allaş, Ahmed Ayzaya, Lukas Afriko, Yaovi Akakpo və Osama Xalayladı. Yerli futbolçulardan isə Rəşad Əzizli, Elməddin Sultanov, Hüseyn Mürsəlov, Asif Məmmədov, Mehrac Baxşalı və Rauf Hüseynlinin sözləşməsi yayda başa çatacaq.
Reallığa baxsaq, yüksək maaşla elitada çıxış edənlər qat-qat aşağı məbləğə aşağı liqada oynayan “Qəbələ”də forma geymək istəməyəcəklər. Ayrılmaq ehtimalı yüksək olan digər legionerlərin razılaşmasına da nəzər yetirək. Bilel Auaşeriya, Zurab Oçiqava, Samuel Tetteh və Kristof Atanqana ilə müqavilənin müddəti 2025-ci ilin yayında başa çatacaq. Bu ilin yanvarında komandaya cəlb olunan Klesio Bauk 2026-cı ilin yayına qədər “Qəbələ”yə məxsusdu. Bəs “Qəbələ” rəhbərliyi kimləri göndərmək, kimləri saxlamaq istəyindədi? Klubun idman direktoru Səbuhi Səfiyarlı ilə əlaqə saxladıq:
“Komanda sonuncu yerdə olduğu üçün növbəti mövsüm 1-ci liqada mübarizə aparacaq. Buna görə də yüksək ödənişli futbolçuların heç birini saxlaya bilmərik. Legionerlərlə birmənalı şəkildə müqavilə müddəti uzadılmayacaq. Ona görə ki, aşağı liqada oynasaq, bizim üçün böyük məbləğ ödəmək mümkünsüz olacaq. Yerli futbolçulardan bəzilərinə təklifimiz olacaq. Əlbəttə, maaşda ciddi fərq qaçılmazdı. Kimsə qalıb oynamaq istəsə başqa, amma çıxıb getmək istəsə belə, sözümüz yoxdu. Təbii ki, bu şərtləri heç kim qəbul etmək istəməyəcək. Müqayisə edəndə büdcədə 10 dəfə fərq olması əsas səbəbdi. Əksər futbolçu yəqin ki qalmaz, böyük qismi ilə yollarımız ayrılacaq. Təkcə biri bizə birinci liqada oynamağa razı olduğunu deyib. Başqaları ilə belə danışıq olmayıb”.
Bu halda növbəti “futbol ili”nə qədər “qırmızı-qaralar”la sözləşməsi olanları hansı aqibət gözləyir? Səbuhi bəyin sualımıza cavabı belə oldu:
“Bəzilərinin müqaviləsində belə şərt var ki, komanda yalnız premyer-liqada oynasa, müqavilə qüvvədədi. Belədə bəziləri ilə müqavilə avtomatik pozulacaq. Kimdə həmin bənd yoxdusa, danışıb, razılığa gələcəyik. Özləri də başa düşür ki, büdcə dəyişirsə, biz o maaşı verə bilmərik”.
RÖYANƏ OĞUZ
Digər xəbərlər
