“Həmişə mübarizə aparmaq lazımdı”
Misli premyer liqasının XXIX turunda “Qəbələ” “Zirə”yə 4:0 hesabıyla məğlub olub.
“Football-plus.az” xəbər verir ki, matçdan sonra “qırmızı-qaralar”ın baş məşqçisi Kaxaber Sxadadzenin mətbuat konfransı keçirilib. Sizi onun fikirləri ilə tanış edirik:
“Danışılası çox şey yoxdu. “Zirə" bu gün mükəmməl pressinq etdi, yaxşı oynadı. Bizim futbolçular istəksiz görünürdülər, ürəklərini qoymurdular. Bu da oyunun nəticəsinə təsir etdi. "Zirə" bizdən daha istəkli idi. İkinci hissədə dəyişikliklər etdik. Gənc oyunçular özlərini yaxşı tərəfdən göstərdi. Həyat mübarizədən ibarətdir. Həmişə mübarizə aparmaq lazımdı. Ürəksiz oynayan futbolçular haqda ciddi tədbir görüləcək.”
- Sizin gəlişinizdən sonra komanda 1 xal toplayıb. İstefa vermək barədə düşünürsünüz?
- Bilirəm ki, sən bunu istəyirsən. Amma qeyd etmək istəyirəm ki, mən gələndə də komanda bu yerdə idi. Bura kömək etmək üçün gəlmişdim. İmicimi qurban verib "Qəbələ"yə gəldim. Qarşıda kubok oyunu var. Uzunmüddətli planlarımız var. Oyunçuların bəzilərinin fərdi keyfiyyətləri çox aşağıdı. İkinci hissədə ürəklə oynayan futbolçular meydana daxil oldu. "Zirə" yaxşı oynadı deyə biz heç nə edə bilmədik.
- Bir futbol mütəxəssisi olaraq "Qəbələ"nin premyer-liqaya layiq komanda olduğunu düşünürsünüz?
- Belə görünür ki, komanda indi layiq olduğu yerdədi. "Qəbələ" böyük klubdu. Biz gələndə 9 xal fərq var idi. Möcüzə olmur. Bu klubu saxlamaq lazımdı. Ümid edirəm ki, hamı yaxşı düşünəcək. Komanda sayı çoxalsa, "Qəbələ" premyer-liqada qalsa, mütləq ilk üçlük uğrunda mübarizə aparacağıq. Aşağı liqaya düşsək, bir il sonra geri qayıdacağıq. Burdakı sponsorların, klub prezidentinin istəklərini bilirəm. 99 faiz insan "Qəbələ"nin premyer-liqada qalmasını istəyir.
