“Komanda sayı artırıldaydı, daha yaxşı olardı. Bölgə klubları da şans qazanardı. İstərdim ki, "İmişli" və "Şamaxı" güclülər dəstəsinə keçsin. Belədə ölkə çempionatı daha çox regionu əhatə edə bilərdi. Legioner limitinin dəyişdirilməməsi doğru qərardı. Amma bildirildi ki, gələn il yenidən baxıla və artırıla bilər. Bunun maksimum 7 olması daha məqsədəuyğun olar. Yəni artırılmasın. Klublarda olan yerli futbolçular Azərbaycan millisinin bazasıdı. Heyətdə yerli oyunçu olmayacağı halda, xaricdən gətirəcəklər. Bu halda cəmi 30 yerli futbolçu, əlavə də 3-5 nəfər əvəzetmə olacaq. Yenə imkanlar məhduddu. Yığmaya seçim imkanları aşağı düşür. Millidə rəqabət getməyəcək. Çünki orda olan 22-23 futbolçunun hamısı eyni gücdə olmalıdı. “Milliləşmənin” tam əleyhinəyəm. Anton Krivotsyuk indiyə qədər Azərbaycan yığmasına nə xeyir verib?! Bunlara heç ehtiyac da yoxdu. Onun yerinə Azər Salahlı və ya başqa bir futbolçu ola bilər. Başqa ölkədə yaşayan Azərbaycan əsilli oyunçunun gəlməsinə etirazım yoxdu. Braziliyalının və ya ukraynalının, bizə heç bir əlaqəsi olmayan adamın Azərbaycan millisinə çağrılması düzgün deyil. "Qəbələ" hazırda Azərbaycanda ən yaxşı infrastruktura malik olan klubdu. İdman prinsiplərinə əməl olunmalıdı. Təəssüf ki, bu da "qırmızı-qaralar"ın bəxtinə düşdü. Kluba əlavə vəsaitin ayrılması və akademiyanin fəaliyyətini davam etdirməsi çox doğru addımdı. İstənilən klub futbolçu yetişdirməyə çalışmalıdı. "Qəbələ" üçün belə addımın atılması alqışlanası qərardı. İrəlidə maliyyə imkanları nəzərə alınmaqla klub sayı artırılmalıdı. Başqa klublar "Qarabağ", "Neftçi", "Zirə" və "Sabah" qədər maliyyə imkanına malik deyil. Başqaları onlarla eyni məbləğ xərcləmir. Deyərdim ki, "Sabah" bütün klublardan yaxşı imkana sahibdi. Ora xərclənən pulla komanda ən azı bugünkü vəziyyətdə olmamalıydı. Eləcə də bu sözüm yuxarda adını çəkdiyim klublara aiddi. Həmçinin “eyni komandalarla qarşılaşmaq çempionatı maraqsız edir” kimi fikirlər də var idi. Bununla razı deyiləm. Format fərqli ola bilər. 12 klubu iki yerə bölməklə “altılıq” sistemi qurula bilər. Bu halda həmin komandalar eyni rəqiblə 4 dəfə görüşməli olacaq. Önəmli olan futbolçunun hazır olmasıdı. İstənilən oyuna eyni formada hazırlıqli çıxmalıdı. Bütün klublarin da strategiyası əvvəlcədən bilinir ki, format nədi və ona uyğun fəaliyyət göstərirlər. Vacib olan hər kəsin işini yerinə yetirilmədi”.

“Limitin saxlanılmasi düzgün qərardı. Bəzi mənbələrdə deyilirdi ki, limit tam ləğv oluna bilər. Bunu o ölkələrdə edərlər ki, yerli futbolçulardan çoxu xaricdə legioner həyatı yaşayır. Bizim isə təəssüf ki, barmaqla sayılacaq legioner futbolçumuz var. Limit artırılsa, milli komanda üçün xeyli problem yaradacaq. Tərəfdarıyam ki, bir yerli futbolçu da əlavə edilsin. Olduğu kimi saxlanılmasını da müsbət qəbul edirəm. "Qəbələ"nin premyer-liqanı tərk etməsi ürək ağrıdır. Amma ötən ilkiqərarlara baxanda idman prinsiplərinə sadiq qalması ən doğru qərardı. Təbii ki, sonuncu kimdisə, 1-ci liqanın çempionu ilə əvəz edilməlidi. Lisenziya şərtlərini kim yerinə yetirirsə, “Qəbələ”nin yerinə keçə bilər. "Qəbələ"ni nəsə əlavə bir qərarla saxlasalar, onun da tərəfdarıyam. Belə infrastrukturu olan bir komandanı itirmək böyük problemdi. Uşaq futbolu ilə bağlı problemlərin həlli də düşünülüb. Yəqin ki, qəbul edilən qərarlar gələcəkdə müsbət nəticə verəcək. Sadəcə, zaman lazımdı. Komanda sayının artırılması gələcək planda nəzərdə tutulur. Onu da nəzərə alaq ki, Rövşən Nəcəf fəaliyyətə təzə başlayıb. Ona da müəyyən zaman lazımdı. Bu, asan bir layihə deyil. Çox güman, yeni prezident öz planlarını qurandan, hər şey yerində olandan sonra komanda sayının artırılması baş tutar”.