Bu gün futzal üzrə yüksək liqada 19-cu turun oyunları keçiriləcək.

İlk matçda U-19 “Neftçi”ni qəbul edəcək. Yığma mövsüm ərzində “dişə çəkiləsi” nailiyyət əldə etmədiyindən meydana məşq üçün çıxacaq. “Ağ-qaralar”ın isə qələbədən başqa yolu yoxdu. İlkin Hacıyevin komandası gümüş medallar uğrunda mübarizədə büdrəməməlidi. Bu yöndə həlledici olacaq son iki görüşdən birincisi məhz budu. Növbəti oyunda “Yasamal Bakı” “Baku Fire”la üz-üzə gələcək. Paytaxt duelinin prinsipiallığı da yuxarıdakı matçla eyni mahiyyət daşıyır. Mövsümü qismən uğurlu keçirən Yasamal təmsilçisinin nəticələri debütant üçün məqsədəuyğundu. “Bakı alovu”na gəlincə, kollektiv turnir cədvəlində ən yaxın izləyicisi “Neftçi”ni iki xal qabaqlayır. Lakin bu, arxayın olmaq üçün yetərli deyil. Odu ki, çarə rəqibdən üç xal qoparmaqdı. Tura “Record club” – “Araz-Naxçıvan” matçıyla yekun vurulacaq. Bilindiyi kimi, “rekordçular” sonuncudu. Təbii ki, turnirin ən güclüsünə qarşı mübarizədə xal ehtiyatını artırmaq imkansız görünür. “Qırmızı-ağlar” isə artıq çempiondu. Onların heç bir turnir motivasiyası qalmayıb.

21 aprel
U-19 – Neftçi İK
Olimpik Star. Saat 14.00.
Yasamal Bakı – Baku Fire
Olimpik Star. Saat 16.00.
Record club – Araz-Naxçıvan
Olimpik Star. Saat 18.00.
Xal durumu: Araz Naxçıvan – 47, Baku Fire – 38, Neftçi İK – 36, Yasamal Bakı – 20, U-19 – 9, Record club – 4.
Bombardir: Reza Abgoun (Neftçi İK) - 55.

KƏNAN BAHADIR