Bəxtiyar Həsənalızadə “Tuzlaspor”dan ayrılır? – özü açıqladı
Millimizin müdafiəçisi Bəxtiyar Həsənalızadənin formasını geydiyi "Tuzlaspor"un baş məşqçisi Bekir İrtəgün istefa verdi.
Bəxtiyar "Football-plus.az"a açıqlamasında komandasında yaşananlara, baş məşqçi dəyişikliyinə belə münasibət bildirdi:
“Bekir İrtəgün çox yaxşı insan və istedadlı çalışdırıcıdı. Məşqçi karyerasına yeni başladığına görə təcrübəsi azdı. Bu da zamanla düzələcək. İstefa xəbəri mənim üçün gözlənilməz oldu. Onun getməsini komandada heç kim istəmirdi. Bu xəbərdən sonra onunla danışdıq. Özünə görə səbəbləri var. Və mən ona haqq qazandırdım. O, daha yaxşısına laiqdi”.
31 yaşlı futbolçu klubun nəticələrindən də söz açdı:
“Hələ ki komandanın vəziyyəti qeyri-müəyyəndi. Mövsümü hansı nəticəylə bitirəcəyimizi bilmirik. Çalışacağıq ki, növbəti turlarda qələbə qazanaq. Oyunlarda iştirak etdiyimə görə şadam. Bu, mənim üçün əla təcrübədi".
Bəxtiyar mövsümün sonunda komandasını dəyişə biləcəyini də istisna etmədi:
“Düzdü, indidən təkliflər barədə nəsə demək tezdi. Qarşıda vacib oyunlar var. Yəqin ki, mayda bu barədə düşünüb, qərar vermək olar. Ancaq, indidən maraqlanan komandalar var”.
Xatırladaq ki, "Tuzlaspor" turnir cədvəlinin 15-ci pilləsində qərarlaşıb.
RÖYANƏ OĞUZ
Digər xəbərlər
