Mövsümün sonuna artıq 7 tur qalır.

Məlumdu ki, hazırda aşkar autsayder “Qəbələ”di.

29-cu turda “Zirə”nin meydanında darmadağın olan (0:4) komandanın elitanı tərk etməməsi möcüzəyə qaldı. “Qırmızı-qaralar”ı 9-cu pillədəki “Kəpəz”dən 14 xal ayırır. Əlbəttə, vaxtilə avrokuboklara vəsiqə uğrunda mübarizə aparan komandanın indi belə durumla üzləşməsi xeyli sual doğurur. Hələ ötən mövsüm ölkə kubokuna yiyələnən, ümumiyyətlə, oyun tərziylə seçilən bölgə təmsilçisinə nə oldu ki, indi elitada qalmaq uğrunda çarpışır? Bu mövzu ətrafında bir neçə sualla “Qəbələ”nin sabiq kapitanı Cavid Hüseynova müraciət etdik.

- “Qəbələ”nin çıxışı və turnir cədvəlindəki yeri sizi nə dərəcədə razı salır?
- Oyunların hamısını izləyirəm. Komandanın nəticələri hər birimizin ürəyini ağrıdır. İstəməzdim ki, belə klub premyer-liqanı tərk etsin. İnanıram ki, mövsümün sonuna qədər vəziyyəti dəyişə biləcəklər. Məncə, şans var.

- “Qəbələ”nin bir neçə ay ərzində bu qədər zəifləməsinin səbəbini nədə görürsüz?
- Bir çox amili vurğulamaq olar. Birincisi ötən mövsüm meydana çıxan heyətin əldən verilməsidi. Bilindiyi kimi, 11 futbolçu komandanı tərk etdi. Yeni gələnlərdən bir-ikisini nəzərə almasaq, transfer edilən oyunçular uğurlu olmadı. Əlbəttə, maddi durum da önəmlidi.

- Sizin “Qəbələ”də olduğunuz vaxtlarda da oxşar problemlər olub? Məsələyə komandanın keçmiş kapitanı kimi yanaşsaz, çıxış yolunun tapılmamasını nə ilə izah etmək mümkündü?
- Bəli, başımıza belə problemlər gəlib. Xüsusilə komandada olduğum son vaxtlarda sıxıntılar var idi. Müəyyən maddi çatışmazlıqlar yaşanırdı. Amma o vaxt futbolçuların səviyyəsi indikindən daha yüksək idi. Düzü, oyunçu cəhətdən hansısa narahatlıq olmayıb. Çünki Baqali Dabo, Stiven Jozef-Monroz kimi yaxşı oyunçular var idi. Yerlilər də daxil olmaqla, yaxşı komanda yığılmışdı. Nəticədə həmin vaxt indiki qədər çətin vəziyyət yaranmadı. Məncə, hazırda daha çox futbolçu baxımından, yəni keyfiyyət cəhətdən problemlər var. Yenə də kənardan baxıb nəsə deməklə olmur.

- Azarkeş amili belə hallarda necə rol oynayır? Nəzərə alsaq ki, klubun illərdi yaralı yerindən biri də məhz budu...
- Düzü, "Qəbələ"nin elə çox azarkeşi yoxdu. Sadəcə, müəyyən bir toplum var. Hansı ki, bizim vaxtlarda da istər səfər, istərsə ev oyunlarında komandanı tək qoymurdu. İndiki vəziyyətdə onları da başa düşürəm. Heç birimizə, Azərbaycan futbolunun inkişafını istəyən və "Qəbələ"nin bu illərdə futbolumuzda böyük rol oynadığını bilən insanların heç birinə xoş deyil. Ümid edirəm ki, bu vəziyyət qısa müddətdə həllini tapar. "Qəbələ"siz premyer-liqa oyunlarını təsəvvür eləmək mümkün deyil. Həmişə istəyərik ki, "Qəbələ" elitada yer alsın, yüksək yerlər uğrunda mübarizə aparsın. Necə ki yarandığı vaxtdan belə olub.

- Komanda sonda yetərincə xal toplaya bilməsə, amma istisna hal kimi elitada saxlanılsa, bunu idman prinsiplərinin pozulması, yoxsa “Qəbələ” üçün haqlı qərar sayarsız?
- Bu suala birmənalı cavab vermək olmur. Çünki burda həm prinsiplərdən, həm də belə bir komandadan söhbət gedir. Tərəzinin bir gözündə prinsiplər, o biri gözündə isə "Qəbələ"di. Bu gün ölkədə yeganə klubdu ki, infrastruktur, stadion, otel - hər şey ideal vəziyyətdədi. Təsəvvür edin ki, 1-ci liqaya düşsə, komandanın və onsuz da yaxşı halda olmayan akademiyanın vəziyyəti necə pisləşəcək. Yəni müqayisə edəndə adam çıxılmaz vəziyyətdə qalır. Hər ikisi bizim üçün vacibdi. Buna cavab vermək mənim üçün olduqca çətindi. Ümid edir və inanıram ki, "Qəbələ" mövsümün sonuna qədər toparlanar.

- “Qırmızı-qaralar” indiki vəziyyətdə kuboku qazanmaq potensialındadı?
- Sirr deyil ki, "Qəbələ" neçə illərdi kubokun finalına qədər oynayan bir komandadı. Bu üzdən bəlli təcrübəsi var. İnanıram ki, bu il də kubokun finalında üstün olacaqlar. Baxmayaraq ki, birinci oyunda "Zirə"yə məğlub oldular, yenə də şasları var. Finala vəsiqə qazana bilərlər. Finalda da kuboku əldə edə biləcək bacarığa sahibdilər. Amma bu il nə dərəcədə alınacaq-alınmayacaq – bunu zaman göstərəcək.

RÖYANƏ OĞUZ