Misli premyer-liqasında 29-cu tur bir çox önəmli məqamla əlamətdar oldu.

Belə ki, turun açılış matçında məğlubiyyətə görə Azər Bağırov istefa verdi, “Zirə” evdə ilk dəfə 4 top fərqi ilə qələbə qazandı, Krunovlav Renduliç ardıcıl 2-ci məğlubiyyətlə barışdı, “Neftçi” 2-ci yeri əldən verdi və s. və i.a. Ümumiyyətlə, artıq çempionatın elə mərhələsindəyik ki, burda hər oyun, hər xal çox vacibdi. “Qarabağ” istisna olmaqla yerdə qalan komandaların taleyi həll olunur.

Turun ilk qarşılaşmasında “Kəpəz” “Araz-Naxçıvan” üzərində əzmkar qələbə qazandı. Muxtar Respublika təmsilçisi ardıcıl 7-ci çempionat oyununda da qələbəyə həsrət qaldı. Elə bu məğlubiyyətdən sonra komandanın baş məşqçisi Azər Bağırov istefa verdi. O, eniş yaşayan komandasını bu durumdan çıxarda bilməyəcəyini anladı. Belədə Elmar Baxşıyevdən sonra Azər Bağırov da Adil Şükürovun növbəti qurbanı oldu. Hər iki çalışdırıcı “Kəpəz”ə məğlubiyyətdən sonra istefa verib. Yeri gəlmişkən, “Qəbələ”ni elitada saxlaya bilməyəcəyinə görə istefa verən Baxşıyev “Araz-Naxçıvan”ı bu durumdan çıxarda biləcəyini düşünürək, komandanın yeni baş məşqçisi oldu. Hazırda Gəncə təmsilçisiylə “qırımızı-ağlar” arasında 2 xal fərqi var. Deməli, yenə də Baxşıyev – Şükürov rəqabətinə şahidlik edəcəyik.

Xorvatiyalı mütəxəssisin gəlişindən sonra yaxşı başlayan “Sabah” indi ardıcıl məğlubiyyətlərə düçar olur. Renduliçin ilk Tovuz səfəri məğlubiyyətlə nəticələndi. İlk “dördlük”dən kənar düşən komandanın ən yaxın rəqibi “Sumqayıt”la arada 3 xal fərqi var.

“Qarabağ” ötən tur çempionluğunu rəsmiləşdirməsinə rəğmən, sona qədər maksimum nəticə əldə etmək istəyini gizlətmir. Qurban Qurbanovun yetirmələri “Səbail”ə hava və su kimi ehtiyac duyduğu 1 xalı da çox gördü. Beləliklə, bir ara turnir cədvəlinin 2-ci sırasına yüksələn Şahin Diniyevin komandası ardıcıl 4-cü oyundan qalib ayrıla bilmədi. 7-ci pillədə qərarlaşan “dənizçilər”in yenidən avrokuboklara vəsiqə uğrunda mübarizəyə girişməsi çətin olacaq.

“Zirə” mövsümün sonuna yaxın toparlanıb. Rəşad Sadıqovun rəhbərlik etdiyi komanda “Qəbələ”nin qapısından 4 cavabsız top keçirtməkə klub tarixinin ən böyükhesablı ev qələbəsini qazandı. “Qartallar” bununla da 2-ci pilləyə yüksəldi. Bölgə təmsilçisinin aqibəti isə heç yaxşı görünmür. Komandanın elitada qalmaq üçün “Kəpəz”lə aradakı 14 xallıq fərqi “əridəcəyi” inandırıcı deyil.

Xal sıxlığını nəzərə alsaq, “Neftçi”nin evdə “Sumqayıt”la bərabərə qalmasını qənimət saymaq olar. Aşağı-yuxarı hər iki komandanın eyni səviyyədə futbol oynadığını da söyləyə bilərik. Doğrudu, “ağ-qaralar” son dəqiqələrdə bəlkə də onlara vacib 3 xal gətirəcək penaltidən məhrum oldu. Lakin oyunun axarı elə bu nəticənin ədalətli olduğunu deməyə əsas verir. Hazırda “Neftçi” turnir cədvəlində 2-ci, “Sumqayıt” isə 3-cü sırada yer alıb. Amma 2-3-cü pillələr uğrunda rəqabətin mövsümün sonuna qədər gedəcəyini təxmin etmək elə də çətin deyil.

Misli premyer-liqası
4-cü dövrə, 29-cu tur
5 aprel
Araz-Naxçıvan – Kəpəz 1:2
6 aprel
Turan Tovuz – Sabah 2:0
Qarabağ – Səbail 4:2
7 aprel
Zirə – Qəbələ 4:0
Neftçi – Sumqayıt 1:1

1. Qarabağ 29 23 3 3 81-26 72
2. Zirə 29 12 9 8 26-18 45
3. Neftçi 29 12 8 9 36-30 44
4. Sumqayıt 29 11 10 8 28-33 43
5. Sabah 29 11 7 11 39-35 40
6. Turan Tovuz 29 10 9 10 44-39 39
7. Səbail 29 10 8 11 42-46 38
8. Araz-Naxçıvan 29 8 8 13 28-39 32
9. Kəpəz 29 8 6 15 32-54 30
10. Qəbələ 29 4 4 21 20-56 16
Bombardirlər: Olavio Juninyo (Qarabağ) – 17, Aleksandr Ramalinqom (Səbail), Yassin Benzya (Qarabağ) - 11 qol.

Növbəti turun proqramı
12 aprel, 19.00. Sumqayıt – Zirə
13 aprel, 16.30. Qəbələ - Turan Tovuz
13 aprel, 19.00. Neftçi – Araz-Naxçıvan
14 aprel, 16.30. Səbail – Kəpəz
14 aprel 19.00. Sabah - Qarabağ

KAMAL SƏFƏR