"Əvvəl də vurğuladığım kimi, "Qəbələ" ilə "Zirə"dən hansının 4-cü yerdə qərarlaşacağını öz aralarındakı oyunlar həll edəcəkdi. Şəxsi oyunlarda isə bölgə təmsilçisi üstündü. Məhz şəxsi oyunlarda üstünlüyə nail olandan sonra "Qəbələ" həm psixoloji üstünlük əldə etdi, həm də kreativ oyun sərgiləməklə nəticələrini yaxşılaşdırdı. Son oyunlarda Elmar Baxşıyevin yetirmələri uğursuzluğa məruz qalsa da, bu onlar üçün maneə olmayacaq. Hazırda mövsümün sonudu deyə, bütün komandalarda yorğunluq hiss olunur.  "Qəbələ" də mövsümi yorğunluqdan əziyyət çəkir. Buna rəğmən, komandanın taleyi öz əlindədi. İnanmıram ki, "Kəpəz" “qırmızı-qaralar”ı üstələsin. "Qəbələ"yə həmin oyunda 1 xal da kifayət edir. Elitada qalmaq məsələsinə gəlincə, "Səbail" bir addım öndədi. Buna rəğmən, indidən hər şeyin həll olunduğunu demək olmaz. Arxayınlıq "dənizçilər"ə baha başa gələ bilər. "Səbail" - "Şamaxı" oyununun əvvəlində hansı komanda daha ehtiyatlı oynasa, o da uğur qazanacaq. Çox stressli görüş olacaq. İdman prinsiplərinə əməl olunmalıdı - buna söz yox. Amma könül istərdi ki, heç bir klub elitanı tərk etməsin və çempionatımızda daha çox iştirakçı olsun. Birinci diviziona yuvarlanan komandaların çoxunun aqibəti bəllidi - dağılırlar. Digər tərəfdən, idman prinsipi ortaya qoyulandan sonra gördük ki, premyer-liqada həm gərginlik, həm də maraq artdı".