Türkiyə Futbol Federasiyasının nəzdində fəaliyyət göstərən Nizam-İntizam Komitəsi superkubok uğrunda oyunda yaşananlarla bağlı cəzaları açıqlayıb.

Xatırladaq ki, aprelin 7-də Şanlıurfada ''Fənərbaxça'' ilə ''Qalatasaray'' Türkiyə superkuboku matçında qarşılaşmalı idi. Amma ''Fənər'' həm oyunun tarixinin dəyişdirilməməsinə, həm də Trabzonda başına gələnlərə etiraz əlaməti olaraq meydana U-19 komandası ilə çıxdı. ''Qalatasaray''ın 50-ci saniyədə İkardi ilə qol vurmasının ardından ''Fənər''in gəncləri meydanı tərk etmişdi. Beləliklə, NİK meydanı tərk etdiyinə görə ''Fənərbaxça''ya texniki məğlubiyyət və üstəlik 4 milyon lirə para cəzası verib. ''Fənər''in idarə heyətinin üzvü, oyunçuları meydandan çıxaran yönətici Ahmet Ketenci idmanın ruhuna zidd hərəkətə yol verdiyinə görə 60 gün səlahiyyətlərini icra etməkdən məhrum edilib.

''Qalatasaray''a isə fanatların davranışı və çirkin tezahüratları üzündən 212 min lirə para cəzası verilib.

Bu qərar federasiyanın idarə heyəti və Apellyasiya Komitəsi tərəfindən təsdiqləndikdən sonra kubok rəsmən ''Qalatasaray''a veriləcək. Komandaya kubokun növbəti ev oyununda təqdim olunacağı gözlənilir. Bu həftəsonu İstanbul nəhəngini 32-ci turda səfərdə ''Alanyaspor''la oyun gözləyir. 33-cü turda isə ''Qalatasaray'' evdə ''Pendikspor''la qarşılaşacaq.

ƏLİ