Türkiyə Futbol Federasiyasının nəzdində fəaliyyət göstərən Nizam-intizam Komissiyası 17-ci turla bağlı cəzaları açıqlayıb.

"Football-plus.az" xəbər verir ki, məlum olduğu kimi ötən tur ''İstanbulspor'' ''Trabzonspor''la ev oyununda 2-ci qolu buraxdıqdan və hesabda 1:2 geriyə düşdükdən sonra prezident Ecmel Faik Saralıoğlunun göstərişi ilə meydanı tərk etmişdi. Yarımçıq qalan oyuna görə ''İstanbulspor''a gözlənildiyi kimi 0:3 hesablı texniki məğlubiyyət verilib. Amma həmin görüşdə trabzonluların heyətində fərqlənən Trezeqe ilə Onuaçunun qolları keçərli sayılacaq. Bundan başqa əlavə olaraq ''İstanbulspor''un hesabından 3 xal silinib və eləcə də başqan Saralıoğluya 90 günlük cəza verilib. ''Fənərbaxça''nın yarımmüdafiəçiləri Fred ilə Mərt Hakan Yandaşın da cəzaları açıqlanıb. Ötən turda ''Kayserispor''la səfər oyununun son saniyələrində hər iki futbolçu hakimə etiraz üzündən meydandan qovularaq ''Qalatasaray''la derbi öncəsində cəzalı duruma düşmüşdü. Nik Mərt Hakana 2, Fredə 3 oyunluq cəza verib. Braziliyalı futbolçu hakimi təhqir edib birbaşa qırmızı vərəqə aldığı üçün onun cəzası daha ağır olub. Amma hər iki oyunçu dekabrın 29-da ''Qalatasaray''a qarşı superkubok oyununda meydana çıxa biləcək. Çünki bu cəzalar yalnız superliqa oyunlarına şamil olunacaq.

ƏLİ