''Fənərbaxça''nın U-19 komandası ilə ''Qalatasaray'' arasında Şanlıurfada oynanılan qeyri-adi superkubok matçında yaşananlar gündəmi zəbt etməkdə davam edir.

Xatırladaq ki, ''Qalatasaray'' həmin oyunda artıq 50-ci saniyədə İkardi ilə qol vurmuş, ''Fənər''in U-19 komandası isə mərkəzdən başlamayaraq meydanı tərk etmişdi. İkardinin vurduğu qol, eləcə də ''Qalatasaray''lıların bu qola sevinməsi sosial şəbəkələrdə ən çox müzakirə olunan mövzuların başında gəlir.

Çoxlarının fikrincə, ''Qalatasaray''lılar hücum etmək əvəzinə topu sadəcə meydandan kənara vurmalı idilər. ''Milliyət'' nəşrinin yazdığına inansaq, baş məşqçi Okan Buruk bu mövzuda səsləndirilən tənqidlərə belə cavab verib:

''Düzdü, ''Fənərbaxça'' meydana gənclərlə çıxmışdı. Amma onların planının nədən ibarət olduğunu bilmirdik. Oyun başlayan kimi duracaqdılarmı, yoxsa, bir qol vurduqdan sonra geri çəkiləcəkdilər? Ona görə də onların planını görmək için oyuna mərkəzdən biz başlamaq istədik. Öncə hərəkətli şəkildə müdafiə olunmağa, sonra da pressinq etməyə başladılar. Onlar hərəkətsiz şəkildə yerlərində qalsaydılar, bizim qol vurmaq niyyətimiz olmazdı. Mərkəzdən başlayan kimi topu nə üçün auta vurmadıq? Çünki etiraz edən biz deyildik. Biz oynamağa gəlmişdik. Nə üçün topu kənara vurmalıydıq? Belə etsəydik, ''Fənərbaxça''nın etirazına dəstək vermiş olacaqdıq''.

Bu arada həmin gün meydanda baş verənlərlə bağlı yeni bir iddia ortaya atılıb. Həmin iddialara görə start fitindən öncə ''Qalatasaray''lı Kərəm Aktürkoğlu ilə ''Fənər''in U-19 komandasının kapitanı Əmirhan Arkutcu arasında dialoq yaşanıb. Kərəm gənc oyunçunun yanına gedərək ''oyun başlayan kimi topu meydandan çıxaracağıq. Siz də başlasaz, belə edərsiz. Sonra nə olacaqsa olsun'' deyibmiş. Əmirhan da onun sözlərini komanda yoldaşlarına çatdırıb. Ona görə də oyun başladıqdan bir müddət sonra ''Qalatasaray''ın topu çıxarmaması, üstəlik hücum edərək qol vurması ''Fənər''in gənclərinin böyük təəccübünə səbəb olub.

Onu da bildirək ki, ''Fənərbaxça'' rəhbərliyinin qərarı ilə superkubokdakı qələbə üçün nəzərdə tutulan pul mükafatı U-19 komandasının üzvlərinə paylanılıb. Bundan başqa prezident Əli Koç U-19 komandasının hər bir üzvünün əlini sıxaraq onları bu cəsarətli addıma görə təbrik edib.

ƏLİ