Qəbələ səfəri "Zirə" üçün heç də həmişə uğurlu alınmır.

"Qartallar" bu bölgədən birinci və sonuncu dəfə 2016-cı ildə 3 xalla (2:1) qayıdıb ki, başqa hallarda ya qalib müəyyənləşməyib, ya da meydan sahibləri rəqibi əliboş yola salıb. Təbii ki, qəsəbə təmsilçisinin hədəflərindən biri də belə uğursuz statistikaya son qoymaq idi. Amma hər şey bununla bitmir. Bir qədər əvvəl başa çatan oyunda "Sumqayıt"ın "Neftçi"ni məğlub edərək (2:1) 2-ci pilləyə yüksəlməsi "Zirə" üçün bəd xəbər idi. Rəşad Sadıqovun yetirmələri ilk "dördlük"də möhkəmlənmək üçün mütləq qələbə qazanmalıydı. "Qırmızı-qaralar"ın durumu isə bəllidi. Sonuncu pillədəki komanda "Kəpəz"dən 3 xal geridədi və bu heç də yaxşı əlamət deyil. Odu ki, "Qəbələ" “doğma divarlar” və "düşərli rəqib" amilindən yararlanıb durumu düzəltməliydi. Amma nə ev sahibləri istəyinə çatdı, nə də qonaqlar.

Rəşad Əhmədovun start fiti hər iki tərəf üçün çətin imtahanın başlanğıcı oldu. İlk dəqiqələr "Zirə"nin üstün performans sərgiləməsiylə yadda qaldı. Bakılılar təhlükəli vəziyyətlər yaratdı. Amma nə Renato, nə də İsmayıl Qismətin ötürmələrindən sonra topu qapıdan keçirə bildi. Oyun belə davam edəcəyi halda "qartallar"ın hesabı açacağı bəlli idi. Amma Ülvi İsgəndərovun da öz planı varmış. O, İlkinin qeyri-dəqiq ötürməsindən və Tyaqonun qapıdan xeyli irəli çıxmasından faydalanıb topu təxminən 50 metrdən tora qovuşdurdu. Portuqaliyalı qolkiper dərhal mövqeyinə qayıtsa da, iş işdən keçmişdi. Hesabın erkən və havada süzülüb "çərçivə"yə daxil olan fantastik qolla açılması qonaqlar üçün "soyuq duş" effekti versə də, tez toparlana bildilər. Nəticədə çox keçmədən hesab bərabərləşdi. Daha dəqiqi, yeni hücum cəhdinə başlayan qonaqlar rahatlıqla irəli getdi. Topu öncə Tyaqo Çantakiasa, o Ceyhuna, sonuncu isə uzun ötürməylə Rəhimə çatdırdı. Yarımmüdafiəçi dabanıyla dəqiq oynadı. Burda İlkin bayaq haqqında bəhs etdiyimiz səhvi "yudu". "Zirə"nin oyunçusu Rəhimin ötürməsini yumşaq toxunuşla qapının yaxın küncünə göndərdi. Bundan sonra oyunun axarı o qədər də maraqlı olmadı. Bilindiyi kimi, "Qəbələ"nin bir neçə aparıcı oyunçusu cəzalı olduğundan bu matçda iştirak etmirdi. Ayzayanın zədəli olması azmış kimi, yeni transfer Bauk da cəmi 16 dəqiqə oynayandan sonra meydanı tərk etdi. "Zirə"nin hücumlarındakı ənənəvi kəsərsizlik isə davam edirdi. Onsuz da "qartallar"ın, adətən, bir "patron"u olur. Buna baxmayaraq, qonaqlar 30-cu dəqiqədə növbəti qola çox yaxınlaşdı. Amma Qismətin rəqibin üç futbolçusunu aldadaraq qapı önünə göndərdiyi topa dəqiq zərbə endirən tapılmadı. Burda nə Utziq, nə də Rəhim yaxşı oynadı. Nəticədə Emil müdaxilə edərək təhlükəni sovuşdurdu. Daha sonra Fuad uzaqdan zərbəylə bəxtini sınasa da, alınmadı. Onun birinci hissənin sonuna yaxın eyni tərzdə cəhdi də fayda vermədi. Fuad Rəhimin ötürməsini qapıya yönəltsə də, Atanqananın toxunuşundan sonra top tirə dəydi.

Fasilədən sonra da "qartallar"ın ikinci qolu vurmaq üçün "qanad çırpdığı" epizodlar bir-birini izlədi. "Qırmızı-qaralar" isə nisbətən zəif təsir bağışlayırdı. Öncə Atanqana Rəhimin sol cinahdan ötürməsinin qarşısını aldı. Daha sonra Tetteh komandasını hesabda önə çıxara bilərdi ki, top qapıdan aralı keçdi. Ardınca Xalayla istəklə irəli atıldı. O, komanda yoldaşına ötürmə vermək istəyirdi. Lakin Renato “sürüşmə” fəndiylə israilli hücumçunun qarşısını aldı. Matç bura qədər yaxşı irəliləyirdisə, 2-ci hissənin ortalarında futbolçular arasında yaranan gərginlik ümumi tempə mənfi təsir etdi. Çünki "Qəbələ"nin futbolçuları bir qədər kobud müdaxilələrlə keçilməz səddə çevrilən Renatoya qəzəblənmişdi. Bu ərəfədə Utziq qeyri-dəqiq zərbəylə yadda qaldı. Sanki "qırmızı-qaralar"ın sabiq oyunçusu köhnə komandasına qol vurmaq istəmədi. Hər halda, peşəkara yaraşmayan epizodu başqa cür dəyərləndirmək olmur! Ardından Renatonun başla zərbəsi də eyni uğursuzluğa düçar oldu. "Zirə" matçın son dəqiqələrində daha dinamik oyun göstərdi. Qonaqlar "Qəbələ"ni aşkar üstələyirdi. Burda Atanqana Rəhimin Kulaça ötürmə verməsinə maneə oldu. Daha sonra Məqsəd qapıya uzaq nöqtədən bəxtini sınasa da, rəqibin qolkiperi topa yiyələndi. İsayev çox keçmədən yenidən qapı önünə ötürmə verdi. Burda Kulaç və Renato ardıcıl zərbələrlə diqqəti çəksə də, Atanqana keçilməz idi. O, Qismətin künc zərbəsindən qapı önünə göndərdiyi topu da ustalıqla uzaqlaşdıra bildi. Bu ərəfədə Salifunun qeyri-dəqiq zərbəsi də qeydə alındı. Ümumiyyətlə, Atanqana bəhs etdiyimiz epizodlardakı seyvlərlə matçın qəhrəmanına çevrildi. Sonda bütün cəhdlərə baxmayaraq, hesab dəyişmədi. "Qəbələ" müdafiə xəttinin etibarlı oyunu, "Zirə" isə çoxsaylı hücum cəhdləri sayəsində 1 xala yiyələndi.

KƏNAN BAHADIR