Bu oyun tərəflərin hər biri üçün özünəməxsus əhəmiyyət daşıyırdı.

“Zirə” həm çempionat, həm də kubok vasitəsi ilə avrokuboklar vəsiqə şansını sona qədər saxlamaq istəyir. Çempionatda, demək olar ki, heç bir hədəfi qalmayan “Qəbələ”nin isə “qapını möhkəm çırpmaqdan” başqa yolu yoxdu.

İlk dəqiqələrdən meydanda gərgin mübarizə izlədik. Topa nəzarət edən meydan sahiblərindən Sumanın zərbəsini Atanqana dəf etdi. Hər iki komanda qol vurmaq üçün tələsirdi. Amma ilk 20 dəqiqənin geridə qalmasına baxmayaraq, hələ də real qol vəziyyəti yaranmamışdı. Nəhayət, qonaqların ifasında ilk təhlükəli vəziyyətin şahidi olduq. Əyyubun ötürməsindən sonra qapıçıyla təkbətəkə gedən Xalayla rəqib müdafiəçilərin təzyiqindən çıxa bilməyərək, topu itirdi. Epizodun davamında əks-hücuma çıxan Sadıqovun yetirmələri hesabı açmağa çox yaxın oldu. Salifunun qapı qarşısına ötürməsindən sonra Rəhim topa toxuna bilmədi. İlk hissədə qol vurulmadı.

İkinci yarıda komandaların aressivliyi daha da artdı. Qonaqların qapısı qarşısında yaranmış qarışıqlıqdan istifadə etmək istəyən Utziq akrobatik zərbəylə sabiq komandasını cəzalandırmağa yaxın oldu. Fəqət Atanqana topu dəf edə bildi. Hücumun davamında Salifu oyundakı səssizliyi pozdu. 51-ci dəqiqədə rəqibin cərimə meydançası daxilində topa qovuşan qvineyalı sol ayağıyla baxımlı qola imza atdı - 1:0.

Qoldan ruhlanan “qartallar” 17 dəqiqə sonra aradakı fərqi iki topa çatdırdı. Meydanın mərkəzində “qırmızı-qaralar”ın top itkisindən sonra İsmayılın usta ötürməsiylə başlayan hücum qolla tamamlandı. Bu dəfə Utziq keçmiş komandasını cəzalandıra bildi - 2:0. Bu arada yerli azarkeşlər tribunaları coşdurur, dayanmadan komandalarına dəstək olurdu. Sxadazenin komandası isə var qüvvəsiylə hücuma atılmışdı. 75-ci dəqiqədə Oçiqavanın uzaq məsafədən vurduğu zərbə təhlükəli alındı. Qonaqların hamılıqla hücuma atılması, təbii ki, müdafiədə boşluqların yaranmasına səbəb olurdu. Elə bu boşluğu görən Renato müdafiənin arxasına uzun ötürmə verdi. Qapıçıyla təkbətək çıxan Rəhim özü zərbə vurmayıb topu boşda olan Cibrilaya ötürdü. Amma o fürsəti dəyərləndirə bilmədi. Pressinqi artıran “Qəbələ” rəqib müdafiəçilərini səhvə yol verməyə məcbur edirdi. Belə epizodların birində Əyyub qapını yoxlasa da, zərbəsi Tyyaqo üçün heç bir təhlükə yaratmadı. Qonaqların təzyiqi, nəhayət, 90-cı dəqiqədə bəhrə verdi. Baukun qapı qarşısına ötürməsini Abu Akal qola çevirdi - 2:1. Cəmi 1 dəqiqə sonra “Zirə” hesab arasındakı fərqi artırmağa yaxın oldu. “Qartallar”ın yeni transferi Arazın zərbəsi qapı tirinə tuş gəldi.

Beləliklə, bu cütdə intriqa Qəbələyə daşındı.

Gözdən qaçmadı
* Meydanda çəkilən ağ xətlər yaxşı vəziyyətdə deyildi. Bəziləri solmuşdu, bəziləri isə butsların altında bərbad günə qalmışdı.
* “Qartallar” azarkeş qrupu dayanmadan fəal şəkildə komandaya dəstək oldu və baş məşqçiyə “Rəşad, kuboku Zirəyə gətir” söylədi.
* 16-cı dəqiqədə meydançaya ikinci topun daxil olmasına rəğmən, İnqilab Məmmədov hücumu saxlamamaq üçün oyunu davam etdirdi.

KAMAL SƏFƏR