Şənbə günü stadionda gələnlər heç də məyus olmadı. Bəlkə də hakimin final fitindən sonra tablodakı hesab sumqayıtlı azarkeşləri pərişan etmişdi. Ancaq oyun baxımından hər iki komanda futbolsevərlərə xoş anlar yaşatdı. Artıq ilk dəqiqədə meydan sahibləri təhlükəli zərbə ilə yadda qaldı.

Səbuhi təxminən 25 metrdən “çərçivə”ni nişan alsa da, Brkiç topun tora daxil olmasına imkan vermədi. Çox keçmədən hesab açıldı. “Kimyaçılar” fəal olsa da, “ağ-qaralar” sevindi. Kornerdən sonra qapı önündə yaranan qarışıqlıq zamanı Sayef dirəyi nişan aldı. Geri dönən top Voislavın qarşısına düşüncə, təcrübəli müdafiəçi şansını qaçırmadı. Fasiləyə qədər hər iki komanda sanki bir-birinin bəhsinə girərək açıq, azarkeşlərə zövq verən hücum futbolu nümayiş etdirirdi. Samir Abasovun çalışdırdığı komanda fasiləyə qədər hesabı bərabərləşdirə bilərdi. Ancaq aprelin 8-i Brkiçin günü idi. Xorvatiyalı qolkiper keçilməz qalaya bənzəyirdi.

İkinci yarı da birincinin davamı oldu. Açıq oyuna üstünlük verən komandalar xoşbəxtliyi rəqib qapısı önündə axtarırdı. Sürətli, rəngarəng hücumlar bir-birini əvəzləyirdi. Lakin qonaqlar imkanlardan maksimum istifadə etməklə növbəti dəfə ustalıq səviyyəsinin həlledici olduğunu göstərdi. “Kimyaçılar”ın həmlələri cərimə meydançasının daxilində və ya ən yaxşı halda uzaqdan zərbə ilə yekunlaşırdısa, “ağ-qaralar” 2-ci hissədə daha üç dəfə İlnuru topu tordan çıxarmağa məcbur etdi. 64-cü dəqiqədə Sezar Meza Kolli Eminin zərgər dəqiqliyi ilə asmasını başla dəqiq tamamladı. 83-cü dəqiqədə isə meydana sonradan çıxan İsmayıl komandasının 3-cü qolunun müəllifi oldu. Sayefdən ötürmə alan yarımmüdafiəçi qarşısında boş zona gördü və sürətlə irəliləyib qüvvətli zərbə ilə uzaq “9-luğ”u dəqiq nişan aldı. İki dəqiqə sonra isə Lebon adını tabloya yazdırdı. Fransalı vingerin qolunda da Sayefin ötürməsini qeyd etmək lazımdı. Bu qoldan sonra artıq azarkeşlər tribunaları tərk etməyə başladı.

Nə qədər qəribə səslənsə də, meydan sahibləri böyükhesablı yenilgiyə layiq deyildi. Baxmayaraq ki, “Neftçi”nin baş məşqçisi mətbuat konfransında nəticənin oyuna görə olduğunu bildirdi.

Gözdən qaçmadı

* Şənbə günü stadionda, demək olar ki, boş yer yox idi. Premyer-liqada iki komanda var ki, Sumqayıta hər gəlişində arenada anşlaq yaşanır. Onlardan biri “Qarabağ”dısa, ikincisi “Neftçi”di. Hər iki klubun “gənclər şəhəri”ndə yetərincə azarkeşi var.
* “Neftçi”nin azarkeşləri çox fəal idi. Bəzən bu fəallıq sərhədi aşırdı. Məhz bu səbəbdən fasilədə polislər qonaq azarkeşlərdən birini tribunadan uzaqlaşdırdı.

Maraqlıdı...

Misli premyer-liqasının 2022/23 mövsümünün sonuncu mükafatçısı da bəlli olub. “Qarabağ”la “Sabah”dan sonra “Neftçi” də ilk “üçlük”də yerini təmin edib. Bakılılar səfərdə “Sumqayıt”ı yenməklə buna nail olub. “Ağ-qaralar” ölkə çempionatları tarixində 21-ci dəfə mükafat alacaq. Bu, yarışın tarixində yeni rekorddu. Öz göstəricisini yeniləyən “Neftçi” bunadək 20 dəfə medalçılar sırasına düşüb. Paytaxt klubu 9 dəfə - 1992, 1995/96, 1996/97, 2003/04, 2004/05, 2010/11, 2011/12, 2012/13 və 2020/21 mövsümlərində çempion titulunu qazanıb, 5 dəfə gümüş (2000/01, 2006/07, 2018/19, 2019/20, 2021/22), 6 dəfə bürünc (1994/95, 1998/99, 1999/00, 2005/06, 2007/08, 2017/18) medala yiyələnib. “Neftçi” ardıcıl 6-cı mövsümü “üçlük”də bitirəcək.