Autsayderlərin bu qarşılaşması xüsusi əhəmiyyət daşıyırdı.

Hər iki komanda elitada qalmaq uğrunda mübarizə aparır. “Kəpəz”lə aradakı 5 xallıq fərq də “Qəbələ” üçün özünəməxsus həyəcan siqnalı idi. Şükürovun yetirmələri aradakı fərqini 8-ə çatdırmaq istəyirdi. “Qırmızı-qaralar” üçün isə bu, bəlkə də son şans idi. Bu üzdən oyunun qarşılıqlı hücumlar şəraitində keçəcəyi gözlənilən idi. Matça bu meydanın sahibi olan qonaq komanda başladı. İlk dəqiqələrdən etibarən “qırmızı-qaralar”ın fəallığı hiss olunurdu. Elə birinci təhlükəli vəziyyəti də onlar yaratdı. 4-cü dəqiqədə Abu Akal fərqlənməyə yaxın olsa da, zərbəsi qeyri-dəqiq oldu. Bir qədər sonra Urfanın zərbəsi təhlükəli oldu. Gəncəlilərin ifasında ilk təhlükəli vəziyyət 19-cu dəqiqəyə təsadüf etdi. Oçiqavanın Amilə qarşı etdiyi kobudluğa görə “Kəpəz” cərimə zərbəsi qazandı. Topun arxasına keçən Papunaşvili baxımlı qola imza atdı - 1:0. Hesabda geri düşən qəbələlilər hücumlarının sayını daha da artırdı. 23-cü dəqiqədə Bilelin zərbəsində İqor sayıqlığını itirmədi. Təzyiqi artıran “qırmızı-qaralar” 25-ci dəqiqədə cərimə zərbəsi qazandı. Allaşın qüvvətli zərbəsindən sonra müdafiəçiyə toxunub istiqamətini dəyişən topu İqor yenə gözəl seyvlə dəf etdi. 39-cu dəqiqədə Ülvinin başla zərbəsindən sonra oyunçular topun Vüsalın əlinə dəydiyini bildirsələr də, baş hakim matçı saxlamadı və VAR-a da baxmağa ehtiyac görmədi. Baxşıyevin yetirmələri 43-cü dəqiqədə qol istəyinə çatdı. Urfanın qapı qarşısına ötürməsini Xalayla başla “çərçivə”yə göndərərək bu dəfə İqoru məyus etməyi bacardı - 1:1. İlk hissəyə artırılan vaxtda “qırmızı-qaralar” əllə oyuna görə yenidən Rəvan Həmzəzadəyə etiraz etdilər. Urfanın zərbəsindən sonra topun Ehtiramın əlinə dəydiyini bildirsələr də, bu dəfə də onların etirazına məhəl qoyulmadı.

İkinci hissədə ilk qol vəziyyətini “Kəpəz” yaratdı. Oçiqavanın keçidindən sonra Martinsin vurduğu zərbə qeyri-dəqiq oldu. 63-cü dəqiqədə Oçiqavanın Mateyə qarşı cərimə meydançası daxilində etdiyi kobudluq penalti ilə nəticələndi. Topun gerisində olan Amil hədəfdən yayınmadı - 2:1. Oyunun belə nəticəsi komandalar arasındakı xal fərqini 8-ə çatdırdı. Bundan sonra “Qəbələ” bütün gücü ilə irəli atıldı. 98-ci dəqiqədə Asəfin qüvvətli zərbəsi qapı tirindən qayıtdı. Son cəhdlər də məğlubiyyətdən qurtulmağa yetmədi. Beləliklə, gəncəlilər elitada qalmaq şansını bir qədər də artırdı. 

Gözdən qaçmadı
* “Xəmsə” azarkeş qrupu hakimin start fitindən 3 dəqiqə sonra tribunada yerini tutdu, 7-ci dəqiqədən sonra “Kəpəz”i dəstəkləməyə başladı.
* Oyun bitəndən sonra “Qəbələ”nin “Red Black Army” azarkeş qrupu və qalan azarkeşləri Elmar Baxşıyevi istefaya səslədi.
* Ənənəyə ziddi olaraq, mətbuat konfransına birinci “Kəpəz”in baş məşqçisi gəldi.

KAMAL SƏFƏR