Köhnə-yeni çempion “Qarabağ”ın meydana, demək olar ki, əsas heyətlə çıxması qalan oyunlara da ciddi yanaşmasının göstəricisi idi.
Yəni komanda xal ehtiyatını daha da artırmaq, futbolçuların formasını qorumaq üçün əlindən gələni edəcəkdi. “Səbail” isə çempionatın ən güclüsünü devirməyi, avrokuboklara vəsiqə uğrunda mübarizəni davam etdirməyi düşünürdü. İlk dəqiqələrdə hər iki tərəfin qarşılıqlı hücumlar qurması gözdən qaçmadı. Qonaqların aqressiv və istəkli çıxışı isə hesabın erkən açılmasıyla nəticələndi. Daha dəqiqi, Silva Quetaya mane olmaq istəyirdi ki, portuqaliyalı yarımmüdafiəçinin zədələnməsinə səbəb oldu. Bu anda topun meydandan çıxması “dənizçilər”ə künc zərbəsi qazandırdı. Rüfət hələ Queta meydana qayıtmadan topu oyuna daxil etdi. Bardeanın 7-ci dəqiqədə zaman və mövqe baxımından düzgün seçimi baş zərbəsiylə hesabı açmasına səbəb oldu. Əlbəttə, burda Lunyovun topa inamsız çıxışı və biganəliyi də sual doğurmaya bilməz. “Səbail”in xoşbəxtliyi, qol sevinci uzun sürmədi. Hücumların intensivliyini artıran ağdamlılar 15-ci dəqiqədə hesaba tarazlıq gətirdi. “Qarabağ”ın qazandığı cərimə zərbəsi zamanı Benzya təxminən 25-30 metrlik məsafədən qapıya “raket” göndərdi. Belədə top qapı tirinə dəyərək tora qovuşdu. “Səbail”in “canlı sədd”i və qolkiperi çarəsiz idi - 1:1. “Köhlən atlar” 24-cü dəqiqədə növbəti dəfə fərqlənsə də, qol sayılmadı. Belə ki, Andrade Abbasla Nərimanın müdaxiləsindən sonra önünə düşən topu qapıya göndərdi. Lakin Abbasın ofsaydda olması sevinci qursaqda saxladı. Bu ərəfədə “Səbail”in oyunun əvvəlinə nisbətən “dişsiz” çıxışını izləyirdik. Odu ki, Benzyanın dubla imza atması çətin olmadı. Fransalı yarımmüdafiəçi 40-cı dəqiqədə Juninyonun ötürməsini qolla tamamladı – 2:1. Əlbəttə, burda Abbasın Alekseyin uzun ötürməsindən sonra topu bir neçə rəqib futbolçunun arasından braziliyalı hücumçuya çatdırması da gözdən qaçmadı. Beləliklə, birinci hissədə “Qarabağ”ın dinamik və aqressiv oyununu izlədiksə, buna uyğunlaşmaqda çətinlik çəkən “Səbail” gördük.
İkinci yarı da “Qarabağ”ın üstünlüyü şəraitində başladı. Artıq “dənizçilər”in yorğun və demək olar ki, məğlubiyyətlə barışmış siması hadisələrin axarına təsirsiz ötüşmürdü. 57-ci dəqiqədə Medina Benzyanın künc zərbəsindən göndərdiyi topu baş zərbəsiylə qapıdan keçirdi. Lakin kolumbiyalı müdafiəçinin epizodun əvvəlində Valdemarı yerə yıxaraq qayda pozuntusuna yol verməsi üzündən “köhlən atlar”ın daha bir qolu qeydə alınmadı. Ağdamlıların növbəti hücum cəhdi isə Nicat İsmayıllının “nöqtə”ni göstərməsiylə nəticələndi. Daha dəqiqi, Luqasi qol vurmaq cəhdiylə irəli atılan Juninyonu cərimə meydançası daxilində yerə yıxdı. Belədə “Səbail”in əleyhinə penalti verildi ki, qonaqları Toral cəzalandırdı. Səlahətin zərbənin yönünü tapması da işə yaramadı. Bundan sonra “Qarabağ” sakitləşdi. Amma “köhlən atlar” yenə də oyunun axarına nəzarət edirdi. Belədə Bayıl təmsilçisinin çox diqqətli olması və əks-hücumlardan maksimum istifadə etməsi vacib idi. Qonaqlar bunu 88-ci dəqiqədə bacardı. Rüfət təlbaşına xeyli irəliləyib “çərçivə”ni dəqiq nişan aldı. “Səbail” gənc yarımmüdafiəçinin baxımlı qolu sayəsində fərqi azaltdı. Oyunda son nöqtəni isə “Qarabağ” qoydu. Abbasın Diakabiyə ötürdüyü top Nərimana çatdı ki, sonuncu Səlahətlə mübarizədən qalib ayrıldı. Hakimin final fiti “Qarabağ”ın məğlubiyyətsiz oyunlar seriyasının 18-ə çatmasını rəsmiləşdirdi.
Gözdən qaçmadı
* Matçdan əvvəl “Səbail”in mərhum veteran futbolçusu Şəhriyar Rəhimovun xatirəsi yad olundu. Qeyd edək ki, o, 1989-cu il aprelin 6-da dünyaya göz açmışdı. “Dənizçilər” fanklubu “Şəhriyar, sən bizim qəlbimizdən” şüarıyla mərhumu andı.
* Bardea qol sevincini Diniyevi qucaqlamaqla göstərdi.
*“İmarət Tayfa” 13-cü dəqiqədən sonra tribunalarda yerini aldı.
* Qurban Qurbanov 60-cı dəqiqədə hakimin qərarına etiraz etdiyinə görə sarı vərəqə aldı.
KƏNAN BAHADIR