Hər iki tərəfin Bayılda keçirilən matça ciddi yanaşmaq üçün özünəməxsus səbəbləri var idi.

Qış fasiləsinə son iki tur qaldığından xalların dəyəri artıb. Bu baxımdan “Səbail” ilk “üçlük”dəki yerini qorumaq və ötən həftə Masazırda (“Sabah” – 0:4) yaşadığı uğursuzluğu unutdurmaq istəyirdi. “Qəbələ”nin isə vəziyyəti bəllidi. Turnur cədvəlinin sonuncu pilləsində qərarlaşan komandanın gələcəyi təhlükə altına düşməkdədi. Üstəlik “Kəpəz” də “Sumqayıt”la heç-heçə edərək “qırmızı-qaralar”la xal fərqini üçə çatdırmışdı. Elmar Baxşıyevin komandası əvvəlki iki oyunda darmadağın olmuşdu. Bu dəfə də nəticə eyni oldu. Qonaqların motivasiyasızlığı ilk dəqiqələrdən bəlli idi. Meydan sahibləri artıq 8-ci dəqiqədə hesabı açdı. Rəşadın topu meydana daxil edərkən yol verdiyi kobud səhv və Raufun diqqətsizliyi Luqasinin 8-ci dəqiqədə qol vurmasına səbəb oldu. Növbəti epizodların birində Ülvi fərqlənmək şansını boşa verdi. Bundan sonra Tettehin qeyri-etik hərəkətiylə qonaqlar azlıqda qaldı. Əslində öncə Anas qaydanı pozmuşdu. Lakin “qırmızı-qaralar”ın üzvü onu ayaqlarından yapışaraq yerə yıxdı və komandasını daha çətin durumda qoydu. Nəticədə “dənizçilər”in üstünlüyü daha da möhkəmləndi. Ardıcıl hücum cəhdlərinə şahidlik etsək də, ilk hissədə hesab dəyişmədi – 1:0.

İkinci yarı da Bayıl təmsilçisinin təzyiqiylə başladı. Rəşad öncə Luqasinin dubl etməsinə, sonra Nunonun fərqi artırmasına mane oldu. 52-ci dəqiqədə isə İlkin topu öz qapısından keçirdi. Çünki o, Rüfətin zərbəsini uzaqlaşdırmaq istəyərkən zərbənin istiqamətini düzgün təyin etməmişdi. Bununla “Qəbələ”nin oyunu tam pozuldu. Futbolçular dəqiq ötürmə verməkdə belə çətinlik çəkirdi. “Səbail”in növbəti hücum cəhdində Asif Pedronun zərbəsini əllə zərərsizləşdirdiyindən Rauf Cabbarov penalti təyin etdi. Ramalinqom bu yolla komandasının üçüncü qolunu vurdu. Daha sonra “dənizçilər”dən Rüfətin və Amilin qapıya qeyri-dəqiq zərbələrini izlədik. “Qəbələ”, ümumiyyətlə, hücum cəhdiylə yadda qala bilmədi. Beləliklə, matç “qırmızı-qaralar”ın darmadağınıyla bitdi.

Gözdən qaçmadı
* Şahin Diniyev Rüfət Abdullayevi danladı və daha diqqətli olmasını tələb etdi.
* “Səbail” akademiyasının yetirməsi 19 yaşlı Araz Mikayılov debüt etdi.
* Tribunaların birində dekabrın 15-də dünyaya gələn şair Ramiz Rövşənin posteri asılmışdı.

KƏNAN BAHADIR