Bu dəfə Azərbaycan derbisinə maraq yetərincə böyük idi.

“Neftçi” 2-ci yerə iddiasını qorumaq üçün çempionatın ən güclü komandasını məğlub etməliydi. “Köhlən atlar”ın isə çempionluğu daha erkən təmin etmək üçün hər oyuna qələbə istəyi ilə çıxması şübhə doğurmur.

Oyun yenicə başlamışdı ki, Yankoviç Mahmudova qarşı inanılmaz aqressivlik nümayiş etdirdi. Kapitanın ayağına sərt toxunuşa görə yerdə qaldı. Elçin Məsiyevin “davam” işarəsinə isə VAR mane oldu. Ədalət təmsilçisi videogörüntüləri izlədikdən sonra monteneqroluya sarı vərəqə göstərdi, halbuki vərəqənin rəngi qırmızı da ola bilərdi. Qarşılıqlı hücumların bir-birini izlədiyi görüşdə ilk təhlükəli vəziyyəti “Qarabağ” yaratdı. Lakin Rza Nərimanın hesabı açmasına imkan vermədi İki yerli futbolçunun mübarizəsindən qolkiper qalib ayrıldı. Ardımdam Bədavi tərs toxunuşla Boqomoslkinin cərimə meydançasında yaratdığı təhlükəni sovuşdurdu. “Neftçi”nin növbəti qol axtarışı Lunyovun Lebonun uzaqdan zərbəsini dəf etməsiylə nəticələndi. Bu yöndə sıra “Qarabağ”da idi. Odu ki, ağdamlılar rəqib üzərində təzyiq yaradıb meydanda söz sahibi olmaq üçün irəli atıldı. Andradenin Benzyaya ötürdüyü top sonda Zubirdə qaldı. Fransalı yarımmüdafiəçi isə “çərçivə”ni düzgün nişan almadı. Çox keçmədən qonaqların növbəti zərbəsi boşa çıxdı. Çünki Veşoviç Zubirin ötürməsini qapıya yönəltsə də, Rza yerində idi. Meydan sahiblərinin qolkiperi bütün bunlardan sonra Yankoviçlə Benzyanın da qol vurmaq cəhdlərinə mane oldu. Beləliklə, 1-ci hissədə həm tribunalarda, həm də meydanda gərgin mübarizə getdi. Düzdü, “Qarabağ” hücumların kəsəri baxımından “Neftçi”ni üstələyirdi. Lakin bu, hesabın açılması üçün bəs etmədi.

İlk yarının axarı ikincinin də gərgin olacağından xəbər verirdi ki, belə də oldu. Hissə başlar-başlamaz “Qarabağ” hesabı açdı. Lakin bu qola görə Nərimanı tərifləməkdən daha çox Qaranı tənqid etmək lazımdı. Təcrübəli futbolçu sanki biranlıq əynində “Neftçi”nin yox, “Qarabağ”ın forması olduğunu düşündü. Nərimana bir növ “al, at” ötürməsi verdi. Bu səhvin təəssüratı unudulmamış Matias “səhnəyə çıxdı”. Bakılıların braziliyalı müdafiəçisi cərimə meydançası həndərəvərində driblinq bacarığını işə salmaqla kobud səhvə yol verdi. Daha doğrusu, aldatmağa çalışdığı Zubirin ondan da yaxşı driblinq həvəskarı olduğunu unutdu. Abdullanın fərqi artırmaq cəhdinin qarşısını Rza kobudluqla aldı. Referi dərhal “nöqtə”ni göstərdi ki, Toral da zərbəni dəqiq yerinə yetirərək komandasının üstünlüyü möhkəmləndirdi – 0:2. “Qarabağ” kimi rəqiblə oyunda axmaq səhvlər üzündən iki qol buraxırsansa, məğlubiyyətlə barışmalısan. İş ondadı ki, “Neftçi” barışmaq istəmədi və 68-ci dəqiqədə penalti qazandı. Meydan sahiblərinin yerinə yetirdiyi künc zərbəsindən sonra Benzyanın qapı önündə topa əllə toxunması şübhəsi yarandı. Epizodu VAR-da incələyən Məsiyev yenə “nöqtə”ni göstərdi ki, Ozobiç 71-ci dəqiqədə fərqi minimuma endirdi. Qol “Neftçi”nin xal ümidini cücərtdi. Bakılılar son dəqiqələrə qədər hücum etdi. Komandalardan biri böyük qüvvə ilə hücuma atılırsa, müdafiədə boşluqlar verməsi təbiidi. “Qarabağ” belə boşluqlardan iki dəfə ustalıqla yararlandı. Juninyonun ötürməsindən sonra qapıçı ilə təkbətən çıxan Toral fərqi artırdısa, lap sonda Silvanın Rzadan dönən zərbəsini Leandro tamamladı. Beləliklə, “Qarabağ” cari mövsümdəki məğlubiyyətsiz oyunlar seriyasını 14-ə, Azərbaycan derbisində isə 11-ə çatdırdı.

Gözdən qaçmadı
* “Forza Neftçi” fanklubu “Əziz bakılılar və şəhərimizin qonaqları” sözlərinin yazıldığı pankart nümayiş etdirdi. Onlar həmçinin “Ağdam susub, sizi gözləyir” şüarını səsləndirdi.
* “İmarət Tayfa” meydan sahiblərinin məğlubiyyəti rəsmiləşdikdən sonra “Elçin, “Neftçi”ni çempion elə”, - deyə qışqırır və Bojoviçi istefaya səsləyirdi.
* Matç bitəndən sonra meydana kənar şəxslər daxil oldu.

KƏNAN BAHADIR