“Qarabağ”ın “Braqa” ilə oyununa görə təxirə salınan bu görüşün önəmini artıran daha bir məqam var idi.

İş ondadı ki, oyun ərəfəsində “Qəbələ”nin baş məşqçi postunda dəyişiklik olmuşdu. “Qırmızı-qaralar”ı Qurban Qurbanovun yenilməz armadasının qarşısına Elmar Baxşıyev yox, Kaxaber Sxadadze çıxarmışdı. Gürcü mütəxəssis sonuncu dəfə 2015-ci ildə - “İnter”in baş məşqçisi olduğu zaman Qurbanovun “Qarabağ”ı ilə üz-üzə gəlmişdi. Fəqət nə indiki “Qəbələ” o vaxtkı “İnter”, nə də “Qarabağ” həmin “Qarabağ” deyil. 9 ildən sonra yenidən bu iki mütəxəssisin duelinin şahidi olduq.

Hakimin start fiti ilə “köhlən atlar” oyuna başladı. İlk dəqiqələrdə tərəflərin hansısa ciddi təzyiqini görmədik. Sakit ötürmələrlə davam edən matçda ara-sıra əks-hücumların şahidi olduq. İrəliləyən dəqiqələrdə isə oyunda canlanma hiss olunurdu. Qonaqların topa nəzarəti şəraitində meydan sahiblərinin də qısa ötürməli hücumları başlayırdı. İlk təhlükəli vəziyyəti Sxadadzenin komandası yaratdı. 14-cü dəqiqədə Almeydanın yanlış ötürməsi zamanı topu ələ keçirən Bilelin qapıya çox da qüvvətli olmayan zərbəsi “çərçivə”dən azca aralı keçdi. İlk yarıda ən real qol vəziyyəti uzatma dəqiqələrində qeydə alındı. Atanqananın qapını tərk edərək irəli çıxması zamanı əks-hücumda rəqibini yaxalamış Diakabi topu qapıçının ayaqları arasında keçirsə də, “çərçivə”dən keçirə bilmədi. İkinci yarıya qonaqlar fəal başladı. Çox keçmədən bu fəallıq bəhrə verdi. Leandronun qapı qarşısına ötürməsini Diakabi qolla tamamladı - 0:1. Hesabda geri düşən qəbələlilər 52-ci dəqiqədə işlərini bir az da çətinə saldılar. Aba Akalın Diakabiya qarşı kobudluğu Tural Qurbanovun cibindən birbaşa qırmızı vərəqə çıxarmasına səbəb oldu. Azlıqda oynayan meydan sahibləri tezliklə daha bir çətinliklə üzləşdi. 59-cu dəqiqədə əllə oyuna görə hakim “Qəbələ”nin qapısına penalti təyin etdi. Topun arxasına keçən Almeyda hədəfdən yayınmadı - 0:2. “Qırmızı-qaralar” başverənlərin şokundan ayılmamış növbəti topu qapısında gördü. 65-ci dəqiqədə Qırtımovun əvəzinə meydana çıxan Rauf topa üçüncü toxunuşunda kobud səhvə yol verdi. Ötürmənin qeyri-dəqiqliyindən yararlanan Nəriman növbəti qolun müəllifi oldu - 0:3. Sxadadzenin ilk matçı heç də yaxşı nəticələnmədi. Komandasını çarəsiz durumdan xilas etmək isə mümkün deyildi. Qarşılaşmada sonuncu nöqtəni “Braqa” ilə oyunun qəhrəmanı Yankoviç qoydu - 0:4. Beləliklə, 9 ildən sonrakı növbəti dueldə Qurbanov həmkarına rəhm etmədi. Debüt matçı Sxadadze üçün hədsiz uğursuz oldu.

Gözdən qaçmadı
* Komandalar meydana çıxarkən yerli azarkeşləri Sxadadzeni alqışlarla qarşıladı.
* Həm “Qarabağ Ordu”, həm də “İmarət Tayfa” tribunada yerini tutmuşdu.
* “Red Black Army”nin üzvlərinin azlığı gözdən qaçmadı.

KAMAL SƏFƏR