Mərdəkanda keçirilən oyun hər iki komanda üçün taleyüklü idi.

3-cü dövrədə cəmi bir dəfə 3 xal qazanan “Araz-Naxçıvan” evdə autsayderi udub mövqeyini yaxşılaşdırmalıydı. “Qəbələ” isə “Kəpəz”in bir qədər əvvəl başa çatan oyunda “Zirə”yə uduzmasından yararlanıb gəncəlilərlə xal fərqini azaltmalıydı. Fürsəti dəyərləndirmək milli fasiləyə yüksək əhval-ruhiyyədə yollanmaq üçün zəmin yaradırdı. Ümumiyyətlə, turlar geridə qaldıqca 1-ci liqaya yaxınlaşan “qırmızı-qaralar”ın qələbədən başqa yolu yoxdu.

Oyunun ilk dəqiqələri meydan sahiblərinin təzyiqiylə müşayiət olundu. Muxtar Respublika təmsilçisi hücum cəhdlərində fəallıq göstərir, rəqibi müdafiə olunmağa məcbur edirdi. Hətta Atanqana cərimə zərbəsini yerinə yetirən Nicata mane olmasa, hesab erkən açılacaqdı. Buna baxmayaraq, qonaqlar mübarizədən qopmadı. Matçın ikinci təhlükəli epizodunda Allaş fərqlənə bilmədi. Avram “çərçivə”yə tuş gələn topu yumruqlarıyla uzaqlaşdırdı. 23-cü dəqiqədə qapı toru silkələndi. Xalayla Raufun uzaqdan ötürməsini qəbul etdikdən sonra Auaşeriyaya çatdırdı. “Kürə”ni tora qovuşdurmaq isə fransalı yarımmüdafiəçi üçün çətin olmadı. Lakin özünün ofsayd vəziyyətində olması üzündən qol qeydə alınmadı. Bu ərəfədə Emil, Rauf və Bilelin qurduğu hücum cəhdini izlədik. Bu dəfə də sonuncudan ötürmə alan Xalayla qeyri-dəqiq zərbəylə yadda qaldı.

Bir neçə dəqiqə sonra Urfan bəxtini sınadı. Müdafiəçi rəqibə təhlükə yaratsa da, top qapıdan aralı keçdi. “Qırmızı-ağlar”ın ikinci tutarlı hücumu 1-ci hissənin sonlarına təsadüf etdi. Qonaqlar Kuzmanoviçə imkan verməsə də, Melo önünə düşən topu hücumun sivri ucunda gözləyən Orxana göndərdi. Epizod komandanın bombardirinin uğursuz zərbəsiylə bitdi. Orxan Muradla Raufun təzyiqinə dözməyib tələsik davrandı ki, qapını dəqiq nişan ala bilmədi. O, çox keçmədən, ikinci dəfə yaxşı fürsəti əldən verdi. Atanqanayla üz-üzə qalan futbolçu büdrədiyindən qapıçı özünü çatdırıb təhlükəni sovuşdurdu. Ruhdan düşməyən naxçıvanlılar növbəti cəhddə istəyinə çatdı. Urfanın Nicata kobud müdaxiləsi üzündən meydan sahibləri cərimə zərbəsi qazandı. 42-ci dəqiqədə Nicatı “kürə”nin başında gördük ki, onun qapı önünə ötürməsini Kurdiç qolla tamamladı. Daha dəqiqi, müdafiəçinin kürəyinə toxunan top dirəyə dəyəndən sonra “çərçivə”dən keçdi. Nəticədə Azər Bağırovun komandası fasiləyə üstün yollandı.

İkinci yarı da Muxtar Respublika təmsilçisinin rəqibi sıxışdırmasıyla başladı. Əvvəl Melo uzaqdan zərbəylə Kuzmanoviçə ötürmə verdi. Lakin sonuncunun başla yumşaq müdaxiləsindən sonra Atanqana topa yiyələndi. Miçonun bir neçə dəqiqə sonra növbəti dəfə uğursuz çıxış etməsi komandasına baha başa gəldi. O, topu Kurdiçə çatdırmaq istəsə də, dəqiq olmadığından Allaş önə çıxdı və qol fürsəti qazandı. Burda Numanın kobud müdaxiləsi qeydə alındığından Məsiyev dərhal əlini cibinə apardı və “qırmızı-ağlar”ı azlıqda qoydu. Cərimə zərbəsini Allaş yerinə yetirdi. Onun birbaşa qapıya göndərdiyi top isə Avram səddini keçə bilmədi. Bundan sonra meydan sahibləri arasında anlaşmazlıq yarandı. Onlar təzyiq altında qaldığından bir-biriylə rabitə qurmaqda çətinlik çəkirdi. Hadisələrin axarı hesabın bərabərləşməsini qaçılmaz etdi. Auaşeriya və Rauf arasındakı “divar ötürmələri” topu sonuncunun Xalaylaya çatdırmasıyla dayandı. İsrailli hücumçu gözlənilmədən ələ düşən şansı maksimum dəyələndirdi. Ardından naxçıvanlıların qol axtarışında olacağı düşünülsə də, belə olmadı. Azər Bağırovun komandası ruh yüksəkliyini bərpa etməkdə çətinlik çəkdi. Belədə “Qəbələ” hücumları sıraladı. Qeyd etmək yerinə düşər ki, Sxadadzenin komandası təhlükəli vəziyyət yaratmaqda çətinlik çəkirdi. Bu sırada Osamanın ötürməsindən sonra Allaşın tirdən qayıdan zərbəsinə toxuna bilərik. Ardından Tetteh iki, Bauk bir dəfə fərqlənmək imkanı qazansa da, “çərçivə”ni dəqiq nişan ala bilmədilər. Sonda hərəyə bir xal düşdü. Nəticədə “Araz-Naxçıvan” ardıcıl 5-ci oyunda qələbə qazana bilmədi. “Qırmızı-qaralar” isə “Kəpəz”lə xal fərqini 11-ə endirdi.


Gözdən qaçmadı
* Azər Bağırov tez-tez idarəçiliklə bağlı şikayətini yan xətt hakiminə çatdırırdı
* Kaxaber Sxadadze oyunboyu futbolçularından narazılıq edir, uca səslə onları danlayırdı
* “Red Black Army” fanklubu 15-20 nəfərlə “Qəbələ”ni dəstəklədi. Redaksiyamıza daxil olan məlumata görə, bölgədən komandanı dəstəkləməyə heç kim gəlməyib.
* “Sektor 85” fanklubu təxminən 40 nəfərlə “Araz-Naxçıvan”ı dəstəklədi. Onlar ölkəmizin bayraqlarını dalğalandırır, musiqi sədaları altında rəqs edirdilər.

KƏNAN BAHADIR