Turun önəmli oyunlarından birində avrokuboklara vəsiqəyə iddialılar - “Səbail”lə “Araz-Naxçıvan” üz-üzə gəldi.

Qarşılaşmanın gərgin mübarizə şəraitində keçəcəyini təxmin etmək olardı. Çünki həm hər iki komanda 22-ci turda meydandan qalib ayrılmışdı, həm də turnir cədvəlində eyni xalla 5-6-cı yerləri bölüşürdülər. Tərəflərin bu oyunda da qələbə üçün oynayacaqları aşkar idi.

Qonaqların pressinqi artıq 45-ci saniyədə özünü göstərdi. Akselin zərbəsi qapının üstündən keçdi. Bağırovun komandası təzyiq göstərərək rəqibi müdafiə olunmağa məcbur edirdi. “Dənizçilər” isə əks-hücumlara çıxmaq istəsələr də, ötürmələrdə dəqiqlik çatmırdı. Buna baxmayaraq, görüşdə hesabı elə meydan sahibləri açdı. 13-cü dəqiqədə künc zərbəsindən sonra Diniyevin ən kəskin qol silahı Ramalinqom başla dəqiq oynadı – 1:0. Bundan sonra qonaqlar hücumların kəsərini bir qədər də artırdı. 19-cu dəqiqədə Kurdiçin müdafiənin arxasına göndərdiyi ötürməni Orxan başla çərçivəyə yönəltsə də, Səlahət çətinlik çəkmədən topu tutdu. Bir qədər sonra səhnəyə yenə Orxan çıxdı. Kadirinin gözəl ara ötürməsindən sonra müdafiəçilərdən sıyrılıb topu sola çəkərək zərbə endirdi. Lakin bu dəfə də top düz Səlahətin qucağına getdi. Bir neçə dəqiqə sonra yenidən “Araz-Naxçıvan”ın “10 nömrəsi” qol imkanını qaçırdı. Nəhayət, 30-cu dəqiqədə Orxan istəyinə nail oldu. Manafovun cərimə zərbəsindən sonra Səlahətdən qayıdan topu tora qovuşdurdu – 1:1. Cəmi 5 dəqiqə sonra Yusifin qapıçıya səliqəsiz ötürmədən sonra Orxan növbəti dəfə fərqləndi. Meydan sahibləri ardıcıl iki qolun şokundan çıxa bilmirdi. Qoldan 1 dəqiqə sonra Kuzmanoviçin iti bucaq altından vurduğu zərbəyə Yusif mane oldu. İlk hissə elə bu hesabla yekunlaşdı.

İkinci hissədə də ilk təhlükəli vəziyyət qonaqlardan gəldi. Meydanın mərkəzində qazanılan topdan sonra qurulan əks-hücum zamanı Kuzmanoviç qapını dəqiq nişan aldı. Lakin yan xətt hakimi Akselin ötürməsi zamanı Kuzmanoviçin ofsaydda olduğunu bildirdi. Meydan sahibləri yavaş-yavaş özünə gəldi. Onların təzyiqi 53-cü dəqiqədə bəhrə verməyə yaxın oldu. Pressinq nəticəsində qazanılan topu Rüfət qapıdan azca aralı göndərdi. 7 dəqiqə sonra isə Bayıl təmsilçisi istəyinə çatdı. Rəqibin 2-ci qolunda kobud ötürmə səhvi ilə yadda qalan Yusif bu dəfə komandasının qoluna səbəbkar oldu. Onun müdafiənin arxasına göndərdiyi ötürməni Ramalinqom maksimum şəkildə dəyərləndirdi – 2:2. 72-ci dəqiqədə Orxan het-trik etməyə yaxın oldu. Rəqib müdafiəçilərini çaş-baş salan forvardın zərbəsi toru yandan silkələdi. 80-ci dəqiqədə isə qapıçıyla təkbətək çıxan Samirin zərbəsi qeyri-dəqiq oldu. 5 dəqiqə sonra Yusif uzaq məsafədən qüvvətli zərbə endirdi. Bu dəfə də qolkiper sayıqlığı əldən vermədi. Tərəflər son ana kimi qələbə əzmi nümayiş etdirdi. İlk yarıda qonaqlar, ikincidə meydan sahibləri fəal oldu. Heç-heçə hesabı dəyişmədi, bu isə o deməkdi ki, komandalar hesabat turuna 5-6-cı yerlərdə qədəm qoymudularsa, elə o yerdə də qaldılar.

Gözdən qaçmadı
* “Sektor-85” azarkeş qrupu 10 nəfərdən ibarət idi, onlardan da ikisi 8-12 yaş arasında olardı.
* “Sektor-85” matç başlamamış “Turan, Arazı buraya gətir” şüarını səsləndirdi.
* “Dənizçilər” azarkeş qrupu “Şəhriyar, sən bizim qəlbimizdəsən” şüarını səsləndirərək dünyasını dəyişən futbolçunu xatırladı.
* Azər Bağırov epizodların birində 4-cü hakim Tural Qurbanova yaxınlaşaraq baş hakim barədə “əslində sarı vərəqə verməlidi. Çünki, mən başlamaq istəyirəm o isə gecikdirir” dedi. 38-ci dəqiqədə olan başqa bir epizodda isə Kamran Əliyevə “gözünün qabağındadı, heç nə yoxdu axı”, – deyə etiraz etdi. Üstəlik bir neçə dəfə öz zonasını tərk etdi.
* 68-ci dəqiqədə Aksel yerdə qalandan sonra penalti gözləyən “Araz-Naxçıvan”ın ehtiyat oyunçular skamyasındakı hər kəs etiraz etdi.
* Şahin Diniyev futbolçusu Nir Bardeaya əsəbləşdi.
* Oyunun son dəqiqələrində “dənizçilər” hakimə təhqir məzmunlu şüarlar səsləndirdi.
* Yığmanın sabiq qapıçısı Kamran Ağayev stadiona gələnlər arasında idi.

KAMAL SƏFƏR