Bu gün Misli premyer-liqasında 29-cu tura start verilib. Turun ilk oyunu “Liv Bona Dea”da keçirilib.

Misli premyer-liqası
4-cü dövrə, 29-cu tur
5 aprel
Araz-Naxçıvan – Kəpəz 1:2
Miço Kuzmanoviç, 16 - Martins Junior, 54, Mate Kvirkviya, 62
“Araz-Naxçıvan”ın bu rəqiblə ev oyunlarının balansı: 3:+1=0-2, 3:4.
2000/01 – 1:3; 2001/02 – 2:0; 2023/24 – 0:1.
Cəzalılar: Vüsal Şabanov (Araz-Naxçıvan), Şakir Seyidov (Kəpəz).
“Futbol+”in proqnozu: 30-30-40.
Bakı. “Liv Bona Dea Arena”. Saat 20.00.

Cari mövsümün sonuna yaxınlaşdığımızı nəzərə alsaq, komandalar bütün matçlara daha ciddi yanaşmalı, xal ehtiyatını artırmağa çalışmalıdı. Turun ilk görüşündə bu məqamın onlar üçün çox əhəmiyyətli olduğu iki kollektiv üz-üzə gələcək. Ardıcıl 6 oyunda qələbə qazana bilməyən “Araz-Naxçıvan” uğursuz seriyanı qırmağa məcburdu. Azər Bağırovun komandası sürətlə autsayderlər sırasına yuvarlanır. Heyətə gəlincə, cəzalı Vüsal Şabanovla yanaşı, zədəli Aksel Nqando da bu matçda komandasına kömək edə bilməyəcək.

28-ci turda “Qarabağ”ın əzici hesabla məğlub etdiyi “Kəpəz” isə toparlanmalıdı. Hər halda, qarşıdakı oyunlar “sarı-göylər”in premyer-liqada qalıb-qalmayacağına aydınlıq gətirəcək. Əlbəttə, böyük hesabla uduzmağın təsəllisi yalnız və yalnız qələbə ola bilər. Adil Şükürov da bunu dərk edir ki, hədəf məhz 3 xala yiyələnmək olacaq. Gəncəlilər üçün daha bir ümid mənbəyi Georgi Papunaşvilinin zədəsini sağaldaraq komandayla birgə məşqlərdə iştirak etməsidi. Başqa zədəli futbolçu yoxdu.

Ümumiyyətlə, bu komandalar indiyə qədər 7 oyunda üz-üzə gəlib. Bunların 2-də “Araz-Naxçıvan”, 5-də “Kəpəz” qələbə qazanıb. Topların nisbətində “sarı-göylər” öndədi – 18:7.

KƏNAN BAHADIR