Bir tərəfdə avrokuboklar vəsiqəyə iddialı “Sumqayıt”, o biri tərəfdə isə elitada qalmaq üçün çarpışan, “Kəpəz”in bir gün əvvəl elə bu stadionda qələbə qazanmasından xəbərdar olan “Qəbələ”. Və boş tribunalar, arzuolunmaz hava şəraiti. Bir sözlə, “qırmızı-qaralar” meydandan xalla ayrılmaq üçün bütün resurslarını səfərbər etməliydi.

Bu duelə başqa prizmalardan da yanaşmaq olardı. Məsələn, “Qəbələ” fasilədə ölkəni tərk etməmişdisə, “Sumqayıt” Antalyada hazırlaşmışdı. “Gənclik şəhəri”nin təmsilçisi transfer bazarında susqun olduğu halda, “Qəbələ”nin göndərdiyi və gətirdiyi futbolçu var. Bir sözlə, oyunun maraqlı keçəcəyini güman etmək üçün əsaslar çox idi. Ancaq…

Bəlkə də kəskin hava şəraiti mübarizənin axarına ciddi təsir göstərdi. İlk dəqiqələrdən qarşılıqlı pressinq izlədik. Qonaqların topa nəzarət etməsi uzun sürmədi. İlk təhlükəli vəziyyəti “qırmızı-qaralar” yaratdı. 28-ci dəqiqədə Bilelin ötürməsindən sonra Xalayla qüvvətli zərbəylə topu qapıya göndərdi, lakin Mehdi zərbəni uzaqlaşdıra bildi. Cəmi 2 dəqiqə sonra yenə eyni cinahdan Əyyub sol ayaqla çərçivəni yoxladı. Təcrübəli qolkiper bu dəfə də hesabın açılmasına imkan vermədi. Qonaqların ilk təhlükəli vəziyyəti 33-cü dəqiqəyə təsadüf etdi. Abu yaxın məsafədən qapını “nişan ala” bilmədi. Cəmi 3 dəqiqə sonra Kasimir təhlükəli zərbə endirsə də, top qapıdan aralı keçdi. Bir qədər sonra Əyyubun qüvvətli zərbəsi də auta çıxdı. İlk hissə qolsuz bərabərliklə yekunlaşdı. İkinci hissəyə meydan sahibləri fəal başladı. Elə ilk real qol vəziyyətini də qəbələlilər yaratdı. Kornerin ardından Xalayla topu başla qapıya göndərdi, lakin rəqibin müdafiəçisi Masaki topu qapı xəttinin üstündən çıxarmağı bacardı. 71-ci dəqiqədə Lukasla mübarizədə yerdə qalan İsaya görə hakim penalti təyin etdi. “Qəbələ” oyunçuları buna etiraz etsə də baş hakim Umudlu qərarından dönmədi. Penaltini dəqiq yerinə yetirən Kasimir matçın taleyini həll edən qolun müəllifi oldu. Bu qoldan sonra daha da ruhlanan çadlı futbolçunun 10 dəqiqə sonra fərqlənmək cəhdinə qapı tiri mane oldu. Meydan sahibləri çox çalışsalar da, onlara lazım olan qolu tapa bilmədilər. 3-cü uzatma dəqiqəsində Muradın başla qüvvətli zərbəsi Baxşıyevin komandasının son cəhdi oldu. Oyun elə bu hesabla yekunlaşdı - 0:1. Beləliklə, ilin ilk oyununda uduzan “Qəbələ” birbaşa rəqibi “Kəpəz”lə mübarizədə bir qədər geri düşdü...

Gözdən qaçmadı
* “Sumqayıt”ın “Kimyaçılar” azarkeş qrupu “Ölməz general Polad Həşimov” və “Şəhidlər ölməz, vətən bölünməz” kimi şüarlar səsləndirdilər. “Qəbələ”nin “Red-Black Army” azarkeş qrupu fəallıqda qonaqlardan geri qaldı.
* Samir Abasovun köməkçisi Seymur Rəhimov matçboyu gah futbolçulara, gah da hakimin qərarlarına etiraz etdi.

KAMAL SƏFƏR