Daniel Alveşin başı dərddən qurtulmur. Onun qanunlarla bağlı növbəti problem ortaya çıxıb.

"Football-plus.az" xəbər verir ki, zorlama ittihamı ilə 4,5 illik həbs cəzasına məhkum edilən və bir neçə gün əvvəl 1 milyon avro girov qoymaqla zaminə buraxılan futbolçu müəllif hüquqlarının pozulması ilə bağlı növbəti dəfə məhkəmə qarşısına çıxacaq. “AS” qəzetinin yaydığı xəbərə görə, Daniel 2020-ci ildə koronavirus pandemiyası ilə bağlı dezinformasiyaya qarşı mübarizəyə yönələn layihədə iştirak edərkən “Aviao” adlı mahnı hazırladıb. Mahnının müəllifləri arasında bir neçə tanınmış musiqiçi var, lakin braziliyalı bəstəkarlar Gilano Mateus və Tyaqo Mateus Alveşin onların adlarını mahnının yaradıcılarının siyahısından çıxardığını iddia ediblər:

Yeri gəlmişkən, Alveşin müvəqqəti həbsdən çıxması üçün 1 milyon avronu Braziliyanın məşhur jurnalı ödəyib. “Mundo Deportivo” qəzetinin məlumatına görə, nəşrin adı açıqlanmasa da, onun məşhur adamlar haqqında cəlbedici reportajları ilə həm ölkə daxilində, həm də beynəlxalq səviyyədə tanındığı qeyd olunub. Məlumatda 1 milyonun Danielin həyatı ilə bağlı eksklüziv müsahibəsinin əvəzində verildiyi bildirilib. Müsahibə futbolçunun həyatını işıqlandıracaq sənədli video formatında razılaşdırılıb. Bəzi mənbələr Alveşə lazım olan pulu “Atletiko”nun hücumçusu Memfis Depayın ödədiyi haqda xəbərlər yaymışdı, lakin onun meneceri bu şayiələri təkzib edib.

Xatırladaq ki, Daniel Barselonadakı “Sutton” gecə klubunda qıza təcavüz etməkdə ittiham olunub. Yanvarın 20-də nəzarətə götürülən müdafiəçi 4,5 il həbs cəzasına məhkum edilib, həmçinin mənəvi təzminat olaraq zərərçəkənə 150 min avro ödəyib. Ötən həftənin bazar ertəsi girov qoymaqla zaminə buraxılıb. O, apellyasiya şikayətinə cavab verilənə qədər azadlıqda qalacaq.