Ölkə çempionatında 28-ci tur intizam sanksiyaları baxımından nümunəvi keçdi. Hakimlər 5 oyunda 17 sarı vərəqə göstərib ki, bu da normal göstəricidi. Amma söhbət hakim qərarlarının məzmunundan gedirsə, bax, burda Qəribi, daha doğrusu, “Araz-Naxçıvan” camiəsini ağlamaq tutur. Kamranbəy Rəhimov Sumqayıtda elə penalti qərarı verdi ki...

Kəpəz – Qarabağ, RAUF CABBAROV
“Qarabağ”ın aşkar üstünlüyü fonunda keçən oyun hakim üçün yorucu olmadı. “Köhlən atlar”ın hər dəfə, demək olar ki, heç bir maneə ilə üzləşmədən hücumlar təşkil etməsi ədalət təmsilçisinin işini xeyli asanlaşdırdı. Ağdamlılar rəqibi keçmək üçün qayda pozuntusuna gərək duymurdusa, gəncəlilər matçın dinamikasına tab gətirmirdi. Cabbarov, sadəcə, bir neçə kritik anda özünü göstərdi. Bu da “Qarabağ”a 2, “Kəpəz”ə 1 sarı vərəqənin göstərilməsiylə nəticələndi. Təsadüfi deyil ki, Adil Şükürov da oyundan sonra futbolçularının meydanda lazımi səviyyədə aqressivlik göstərməməsindən gileyləndi.

Sumqayıt – Araz-Naxçıvan, KAMRANBƏY RƏHİMOV
“Sumqayıt”ın 4 futbolçusu “sarı” ilə, “Araz-Naxçıvan” isə haqsız penaltiylə üzləşdi. Rezabalanın qapını uğrusuz nişan alandan sonra qolkiper Kristian Avramla toqquşaraq yerdə qalması yanlış dəyərləndirildi. Həm Kamranbəy Rəhimov, həm də VAR hakimi Cavid Cəlilov hakimliyin üzərinə ləkə salmaqdan çəkinmədi. Hadisənin AFFA Hakimlər Komitəsinin sədri Barış Şimşəyin (hakim-inspektor) və PFL-in texniki-idman şöbəsinin direktoru Elgiz Abbasovun (AFFA nümayəndəsi) gözləri qarşısında baş verməsi daha biabırçı oldu. Hələ Cavid Cəlilovun Hakimlər Komitəsinin tərkibində departament rəhbəri olduğunu demirik. Kamranbəy Rahimov isə əvvəlki günlərinə dönməlidi. Deyəsən, 1-ci divizionda yetərincə təcrübə yiyəsi ola bilməyib!

Qəbələ - Neftçi, CAVİD CƏLİLOV
Oyunda bir neçə diqqətçəkən epizod oldu. Bunlardan biri Şinyaşikinin rəqibin cərimə meydançasında yerdə qalması ilə bağlıdı. Hansı ki, baş hakim qayda pozuntusu olmadığını dedi, oyun davam etdi. Epizodun təkrarına baxanda qərarın doğru olduğunu görmək mümkündü. “Qəbələ”nin vurduğu iki qol isə ofsayd səbəbindən qeydə alınmadı. Bu qərarların da doğru olduğunu aşkar şəkildə gördük. “Neftçi”nin vurduğu qola gəlincə, epizoddan əvvəl Dieqo Valdes “qırmızı-qaralar”ın futbolçusu Ahmed Ayzayaya qarşı sərt oynasa da, hakim topu avantaja buraxdı. Epizodun davamında topu itirən qəbələlilər qapılarında matçın taleyini həll edən qolu gördü. Ümumilikdə hakim oyunu normal idarə etdi.

Səbail – Turan Tovuz, RƏVAN HƏMZƏZADƏ
Bayılda gərgin və maraqlı görüş alındı. Artıq 5-ci dəqiqədə hesab açıldı. Lakin baş hakim qolu qeydə almadı. Videotəkrarda da göründü ki, Madi Queta ötürmə anında oyundankənar vəziyyətdədi. İlk hissənin sonlarında Səlahət Ağayev Aleks Souzanın qarşısını kobudluqla kəsdi. Nəticədə Həmzəzadə “nöqtə”ni göstərdi. Həmin qərarın da doğru olduğunu vurğulamaq lazımdı. 87-ci dəqiqədə həmin epizodun oxşarı “Turan Tovuz”un qapısı qarşısında yaşandı. Rüfət Abdullazadə Aydın Bayramovla mübarizədə yerdə qaldı. Amma referi oyunu davam etdirdi. Videotəkrarda da qolkiperin topa oynadığı göründü. Ümumilikdə Rəvan Həmzəzadə oyunu ideala yaxın idarə etdi.

Sabah - Zirə, ELÇİN MƏSİYEV
“Zirə”nin minimal hesabla qələbə qazandığı qarşılaşmada Elçin Məsiyevin başçılıq etdiyi hakimlər briqadasının nəticəyə təsir edən səhvi olmadı. Rəqibləri birləşdirən cəhət ikisinin də 2-ci yer uğrunda mübarizə aparması idi. “Qartallar”ın vurduğu qol qaydalar çərçivəsində idi. Ümumiyyətlə, referi matçı qənaətbəxş idarə etdi. İkinci hissə qonaqların kəskin təzyiqiylə başladı və ilk yarı ilə müqayisədə daha canlı keçdi. Cəmi iki dəfə əlini cibinə atan Elçin bəy səhvə yol vermədi.