Yeni mövsümün 2-ci turunda qol sayında orta məhsuldarlıq aşağı düşdü, 4 oyunda 8 qolun vurulması heç də yüksək nəticə deyil. Hakim qərarları ilə bağlı narazılığını gizlətməyən ilk baş məşqçi Şahin Diniyev oldu. Onun fikrincə, Süleyman Əhmədov Kenni Sayevə qarşı penaltilik qayda pozuntuna yol verməmişdi. Hakimlər hesabat turunun oyunlarında 19 sarı (biri Diniyevin köməkçisi Elmir Xankişiyevə), 1 qırmızı vərəqə göstərdi. “Qəbələ”dən Ülvi İsgəndərov pis mənada cığıraçan rolunu oynadı.

Qarabağ – Turan Tovuz, RAUF ALLAHVERDİYEV
“Turan Tovuz” ilk dəqiqələrdən “Qarabağ”ın ağır təzyiqi ilə üzləşdi. Bu üzdən qonaqlar daha aqressiv oyun göstərirdilər. Buna baxmayaraq, hakim təmkinli davranır, bəzi hallarda güzəşt edirdi. Ağdamlıların futbolçusu Rahil Məmmədov isə həqiqətən həddi aşmışdı. Fit sahibinin sarı vərəqə göstərməsi onu özünə gətirdi. Baş məşqçi Ayxan Abbasovun “qırmızı” tələbinə məhəl qoyulmadı. Daha sonra Millerin Diakabiyə, Romaonun Ayxan Hüseynova qarşı qayda pozuntusunu izlədik. Allahverdiyev hər iki futbolçunu dərhal cəzalandırdı. Millerin epizodunda “sarı” yeganə çıxış yolu idisə, Julio bağışlana bilərdi. Bundan başqa, ilk yarıya 1 yox, azı 3 dəqiqə əlavə olunmalıydı. Umumilikdə hakim idarəçiliyindən ciddi narazılıq qeydə alınmadı.

Neftçi - Səbail, RAUF CABBAROV
Derbidə hakimliklə bağlı qəliz məqamlar çox olmadı. Düzdü, bəzi məqamlarda futbolçular arasında anlaşmazlıqlar olurdu. Lakin Rauf Cabbarov dərhal müdaxilə edərək meydanda əsas söz sahibi olduğunu göstərirdi. 74-cü dəqiqədə baş verən hadisə buna misaldı. Pedro Nuno ilə Qara Qarayev arasında baş verən itələşməyə Cabbarov dərhal sərt reaksiya verərək onları sarı vərəqə ilə cəzalandırdı. Penalti epizodunda isə hakim haqlı idi. Topa daha yaxın olan Sayef ayağını bir qədər qaldıraraq onu ələ keçirdi. Lakin Süleyman Əhmədov rəqibə sərt müdaxilə edərək qaydanı pozdu. Cabbarov oyunu ümumilikdə ideala yaxın idarə etdi.

Zirə - Kəpəz, KAMAL UMUDLU
Mübarizə meydanın mərkəzində gedirdi. Bunun nəticəsidi ki, tez-tez qayda pozuntuları olur və referi fitini səsləndirirdi. "Zirə"nin oyunçuları daha aqressiv idi. Oyunda, demək olar, mübahisəli vəziyyət olmadı. Yalnız 90+1-ci dəqiqədə "Kəpəz" futbolçuları "qartallar"ın qapısı qarşısında qol vəziyyəti yaradarkən yan xətt hakimi bayrağı qaldırdı. Sonda nə baş məşqçilər, nə də futbolçular hakimlikdən narazılıq etdi. Oyunun intizamlı keçdiyini deyə bilərik. Referi cəmi 3 dəfə əlini cibinə atdı. Verilən sarı vərəqlər də yerindəydi.

Araz-Naxçıvan” – Qəbələ, FƏRİD HACIYEV
Oyunu normal idarə etdi. İlk sarı vərəqəni 24-cü dəqiqədə haqlı şəkildə “Qəbələ”nin futbolçusu Haniyə göstərdi. Çünki o, təhlükəli “sürüşmə” fəndi etmişdi. Hacıyevin uzatma dəqiqələrində Ülvi İsgəndərovu birbaşa “qırmızı” ilə meydandan qovması da haqlı qərar idi. Çünki o, topsuz vəziyyətdə rəqibin başına zərbə vurmuşdu.