Mövsüm hələ təzə başlayıb, ancaq hadisələrin axarı indidən nəzarətdən çıxmaqdadı.

Hesabat turunda futbolçulardan heç birinin qırmızı vərəqə almaması heç də meydandakı səliqəli mübarizədən xəbər vermir. 5 oyunda ümumilikdə 32 sarı vərəqə göstərildi ki, oyunbaşına 6-dan artıq vərəqə düşür. Hələ biz onu demirik ki, 5 oyunun dördündə baş məşqçilər və məşqçilər də hakimlərin qəzəbinə tuş gəldi. “Sabah”ın çalışdırıcısı Murad Musayev flaqmanlığı kiməsə vermək niyyətində deyil. Ancaq bu tur onun davamçıları artdı. İlqar İsrafilov, Elmar Baxşıyev, Samir Abasov və Etibar İbrahimov da müxtəlif rəngli vərəqələrlə cəzalandırıldı.

Kəpəz - Araz-Naxçıvan, KAMRAN ƏLİYEV
Ədalət təmsilçisi çətin sınaq qarşısında idi. Gəncəli azarkeşlərin təzyiqi nəinki rəqibi, hakimi də təsir dairəsinə salmışdı. Tribunalarda əyləşənlər qəzəbini tökmək üçün himə bənd idi. Əlbəttə, belə şəraitdə referi daha diqqətli olmalıydı. Kiçik səhvləri saymasaq, Əliyevin idarəçiliyini qənaətbəxş saymaq olar. O, yetərincə soyuqqanlı, səbirli və ədalətli davrandı. Təyin etdiyi iki penaltiyə və sarı vərəqələrə şübhə ilə yanaşmaq olmur. Matçın sonunda "Kəpəz" tərəfdarlarının fitəbasmasını isə məğlubiyyəti həzm edə bilməmək və günahkar axtarışı kimi qiymətləndirmək mümkündü.

Qəbələ - Zirə, CAVİD CƏLİLOV
Liderlə autsayderin görüşü hər iki komanda üçün eyni dərəcədə vacib idi. Prinsiplərin və emosiyaların danışacağı oyunda ədaləti qorumaq isə zəngin təcrübə tələb edirdi. Cəlilovun gah sağa, gah sola əsməsi birmənalı qarşılanmadı. Görəsən, referi İlkin Qırtımovu itələyərək yerə yıxan Eldar Quliyevi niyə meydandan qovmadı? Güzəştə getdisə, həmin humanistliyi Elmar Baxşıyevə də göstərərdi! Hakim Eldarın “qırmızı”sını 4 futbolçu arasında “sarı” kimi bölüşdürdü. Ümumiyyətlə, azarkeşlərin belə düzgün nəticə çıxardığı epizodları ədalətli qiymətləndirə bilməmək əvəzinə ingiltərəli həmkarı Andi Ueyn kimi özünə qırmızı vərəqə göstərməliydi.

Sumqayıt – Neftçi, RAUF ALLAHVERDİYEV
Gərgin mübarizə şəraitində keçən, amma qol vəziyyətləri sarıdan yoxsul qarşılaşmada hakim üç dəfə əlini cibinə saldı. 29-cu dəqiqədə Filip Ozobiçlə Səbuhi Abdullazadə arasındakı mübarizədə qonaqların xeyrinə qərar verdiyinə görə Samir Abasovu qəzəbləndirən hakim oyundan sonra “Sumqayıt”ın çalışdırıcısını sarı vərəqə ilə də cəzalandırdı. Düzdü, bu dəfə Abasovla hansısa futbolçu yox. həmkarı Adrian Mutu arasında münaqişə yaşandı. Baş məşqçilərin də oyundan sonra idarəçiliklə bağlı irad bildirmədiyini nəzərə alsaq, Allahverdiyevdən narazı qalmaq üçün əsas yoxdu.

Səbail – Qarabağ, KAMRANBƏY RƏHİMOV
Qonaqların erkən qolu oyunu qızışdırdı. Hər iki tərəf daha da fəallaşdı. Bu da hakimin hərəkətliliyini artırdı. İlk yarıda yaddaqalan epizod ədalət təmsilçisinin qonaqların qaplşısına penalti təyin etməsi idi. Nədənsə referi VAR-a baxmağa ehtiyac duymadı. Amma VAR otağı da qərara müxalif olmadı. İlk yarıda əlini cibinə atmağa ehtiyac duymayan referi ehtirasların gərginləşdiyi 2-ci hissədə 6 futbolçunu sarı vərəqə ilə cəzalandırdı. Amma onun qərarlarının mübahisə doğurmadığını, Rəhimovun oyunu yetərincə yüksək səviyyədə idarə etdiyini vurğulamağa dəyər.

Sabah – Turan Tovuz: RAUF CABBAROV
5-ci turun açılış oyunu olduqca gərgin keçdi. Qonaqların üstün performans sərgilədiyi qarşılaşmada hakimliklə bağlı iradlar oldu. Əsas məqam 35-ci dəqiqədə Aleksey İsayevin yerdə qalması ilə bağlı oldu. Ayxan Quseynov yarımmüdafiəçiyə qarşı kobud oynasa da, Rauf Cabbarov oyunu davam etdirdi. Bu anda Murad Musayev özündən çıxdı. İlk hissədən sonra isə həm İsayev, həm Musayev Cabbarova etiraza görə sarı vərəqə ilə cəzalandılar. İkinci hissədə ciddi hakim səhvi qeydə alınmadı. Düzdü, xırda məqamlar var idi. Amma Cabbarovun kobud oyun və hərəkətlər zamanı müdaxiləsi qarşılaşmada dava-dalaşın qarşısını alırdı. İlk hissədəki səhvdən başqa referinin başqa günahı olmadı.