Təkcə elə futbolçulara 26 sarı, 2 qırmızı vərəqə göstərilibsə, turun təmiz idman mübarizəsi şəraitində keçməsindən danışmağa dəyməz.

“Zirə” – “Sumqayıt”, “Araz-Naxçıvan” – “Neftçi” oyunları bu mənada “seçildi”. Hər iki oyunda hakim qırmızı vərəqəyə əl atmalı oldu.

Turan Tovuz – Qəbələ, ƏLİYAR AĞAYEV
Tovuzda futbol adına hər şey var idi. 4 qol vuruldu, "Qəbələ"nin məşqçisi Xaqani Məmmədov meydandan qovuldu. Oyunun idarəçiliyində isə bizim gördüyümüz qədər problem var idi. Ölkənin ən yaxşı hakimi olan Əliyar Ağayev bəzi məqamlarda çətinlik çəkirdi. FİFA referisi penalti epizoddunu doğru dəyərləndirə bilmədi. Jurnalistlər sektorundan isə topun Marandiçinin əlinə dəydiyi açıq-aşkar görünürdü. Lakin Ağayev bunu görə bilmədi. Yaxşı ki referi VAR-ın müdaxiləsinə ehtiyac duydu. Bundan başqa, Əliyar bir çox epizodlarda futbolçularla uzun-uzadı izahat işi aparırdı. Halbuki daha qətiyyətli olmalıydı. Bir sözlə, FİFA referisi bu oyunu potensialından zəif idarə etdi.

Kəpəz – Səbail: RƏVAN HƏMZƏZADƏ
Oyun o qədər sürətli və maraqlı keçirdi ki, hakimin meydanda varlığı ilə yoxluğu hiss olunmurdu. Oyundan sonra baş məşqçilərin də idarəçiliklə bağlı gileylənməməsi dediklərimizin sübutudu. Düzdü, Həmzəzadənin xırda səhvləri var idi. Bəzi məqamlarda köməkçiləri referini yönəldirdi. Lakin əsas və vacib məqamlarda baş hakim qətiyyətli qərarlar verirdi.

Zirə - Sumqayıt, KAMRANBƏY RƏHİMOV
Hər iki komanda meydandan yaxşı nəticə ilə ayrılmaq istəyirdi. Tərəflər ilk dəqiqədən sərt oyuna üstünlük verdi. Zeblinin erkən “qırmızı”sı mübahisəyə açıq qərardı. Rəşad Sadıqovla yardımçısı Eltun Yaqublu da bir neçə dəfə hakimə etirazını bildirdi. Amma Rəhimov onları da “sarı” ilə “mükafatlandırdı”. 27-ci dəqiqədə Qismət Alıyev rəqib oyunçu ilə çiyin-çiyinə mübarizədə sanki qaydanı pozdu, amma fit çalınmadı. Bir neçə saniyə sonra Qismətə qarşı oxşar hərəkətə görə referi qayda pozuntusu qeydə aldı. Bu qərar Samir Abasovu özündən çıxardı və o, hakimə emosional şəkildə etiraz etdi. Mübahisənin davamında baş məşqçi “qırmızı” ilə cəzalandı. Futbolçular arasındakı qarşıdurmalar, ədalət təmsilçisinin də səhvlə zəngin qərarları oyunun intizamını pozdu, bu da seyrçilərin etirazı ilə nəticələndi. Oyuna əlavə olunan sonuncu dəqiqədə Rüstəm Əhmədzadə komandasının 2-ci qolunu vurdu. Öncə qol qeydə alınsa da, bir qədər sonra referi VAR-a yaxınlaşaraq qolu ləğv etdi. Ümumilikdə oyun sərt, qayda pozuntuları və vərəqələr fonunda keçdi. Kamranbəy Rəhimov isə heç də ideal qərarlarla yadda qalmadı.

Araz-Naxçıvan – Neftçi, İNQİLAB MƏMMƏDOV
Bu matçdakı hakim qərarları müzakirə olunmalıdı. 7-ci dəqiqədə Olanarenin Vadim Abdullayevin ötürməsinin qarşısını almaq istəyərkən əllə oynamasıyla bağlı ciddi şübhə var. “Araz-Naxçıvan”nın futbolçuları buna görə referiyə etiraz etsə də, İnqilab Məmmədovu qərarından döndərə bilmədilər. 79-cu dəqiqədəki penalti qərarı da yetərincə şübhəlidi. Videotəkrar zamanı Azzouinin özünü bilərəkdən yerə atdığını hiss edirik. Kadiri Mohammedə 86-cı dəqiqədə “qırmızı” göstərilməsi isə ədalətli qərar idi.

Qarabağ - Sabah, TURAL QURBANOV
"Qarabağ"ın aşkar üstünlüyü şəraitində keçən matçı idarə etmək çətin olmamalıydı. Komandalar intizamlı oyun sərgilədi, cəmi 4 sarı vərəqə qeydə alındı. Maraqlıdı ki, oyunu hakimin ciddi səhvləri müşayiət etdi. VAR Tural bəyin "ədalət"inə müdaxilə etməsəydi, yekun nəticə fərqli olacaqdı. Təbii ki, Juninyonun qolunun sayılmaması da başqa dərddi. Yəqin "Qarabağ"ın baş məşqçi Qurban Qurbanovun məhz bu məsələyə toxunmasını xatırlayırsız. Mütəxəssis, adətən, belə məsələlərə münasibət bildirmir. Bu dəfə dilləndiyini nəzərə alsaq, vəziyyət hrç də ürəkaçan olmayıb.