“Qəbələ” səfər matçından sərfəli nəticəylə döndüyündən yarımfinal ümidləri tükənməmişdi.

Fiziki və psixoloji cəhətdən tam hazırlaşıb doğma meydanda rəqibi məğlub etmək lazım idi. Söhbət mövsümə qış fırtınası kimi başlayıb, sonradan küləksiz yay gecələrini xatırladan “Araz-Naxçıvan”dan gedir. Hər iki komandanın təcrübəli futbolçulardan ibarət olduğunu nəzərə alsaq, oyunun bizə gərgin mübarizə vəd etdiyinə şübhə yox idi.
Muxtar Respublika təmsilçisi növbəti uğursuzluğa Qəbələdə düçar oldu. Bəs premyer-liqanın “zəif bənd”i bunu necə bacardı? Təbii ki, ilk dəqiqələrdən rəqibinə ciddi təzyiq göstərməklə. Hətta Allaşın uzun ötürməsini qarşılayan Xalayla başla zərbə endirərkən dəqiq olsaydı, hesab artıq 2-ci dəqiqədə açılacaqdı. Əlbəttə, ona mane olan Avramın cəld müdaxiləsi də diqqətdən yayınmadı. Bundan sonra “Araz-Naxçıvan”ın əks-hücumunu izlədik ki, Maşikenin qüvvətli zərbəsi tirdən qayıtdı. Növbəti epizodda top Turanın sonuncu toxunuşundan sonra Atanqanın ayaqları arasından sıyrılıb qapıdan aralı keçdi. Burda Manafovu dayandırmaq üçün var gücüylə qaçan Bilel sürətini azalda bilmədiyindən qapıçıyla toqquşdu. Daha dəqiqi, komanda yoldaşını tapdalamalı oldu. Hücum cəhdlərinin bir-birini izlədiyi matçda öncə Avram Bilelin və Xalaylanın, sonra Atanqana Turanın zərbəsini dəf etdi. Nəhayət, hissənin sonunda “Qəbələ” hesabı açdı. Xalayla Bilelin zərbəsindən sonra qapıçıdan dönən topu təkrar zərbə ilə tora qovuşdurdu. Bir müddət sönük davam edən oyun 42-ci dəqiqədə yenidən canlandı. Çünki Urfan fərqi ikiyə çatdırdı. Bu anda yan xətt hakimi ofsayd bayrağını qaldırsa da, VAR-ın müdaxiləsiylə qol qeydə alındı.
Hesabdan göründüyü kimi, ikinci hissədə qapılara qol vurulmadı. Amma bu, oyunun sıxıcı keçdiyi mənasına gəlmir. Tərəflər qalan dəqiqələrdə də baxımlı oyun göstərdi. Baxımlı hücum cəhdləri və təhlükəli qol vəziyyətləri izlədik. “Araz-Naxçıvan”dan Azzazui iki dəfə, “Qəbələ”dən Xalayla və Gilad hərəyə bir dəfə hesabı dəyişməyə yaxın oldu. Naxçıvanlılar hesabı bərabərləşdirmək bir yana, heç təsəlli qolunu da vura bilməməklə kubok uğrunda mübarizədən çəkildi. “Qəbələ”ni isə yarımfinalda “Zirə” ilə duel gözləyir.

Gözdən qaçmadı
* Oyunu izləyənlər arasında Qəbələnin icra başçısı Səbuhi Abdullayev də var idi. O, qarşılaşma bitəndən sonra klub rəsmilərini və futbolçuları təbrik etdi.

KƏNAN BAHADIR