Hazırda ölkə çempionatında ev oyunlarına daha çox azarkeş gələn komanda “Turan Tovuz”du.

Bu üstünlükdən, yəni azarkeşlərin rəqibi daim təzyiq altında saxlanmasından yararlanan “bozqurdlar” son 5 ev oyununda məğlub olmamışdı. Ayxan Abbasovun yetirmələri evdəki məğlubiyyətsizlik seriyasını davam etdirmək üçün bu qarşılaşmada da rəqibindən xal almalıydı. Rəqib isə yeni baş məşqçi gəlişindən sonra toparlanmaq istəyən, fəqət hələ də özünə gələ bilməyən “Neftçi” idi.

İlk dəqiqələrdən etibarən meydan sahiblərinin rəqib üzərində ciddi pressinqinin şahidi olduq. Eyni zamanda rəqibin təzyiqindən qurtulan kimi “ağ-qaralar”ı əks-hücumlarda gördük. İlk təhlükəli zərbə ev sahiblərindən gəldi. Sadəcə, Ayxanın qüvvətli vuruşunda dəqiqlik çatmadı. Növbəti cəhddə Ayxanın künc zərbəsindən ötürməsindən sonra Bruno başla qeyri-dəqiq oynadı. Qonaqların ifasında ilk təhlükəli vuruş Koffinin ifasında oldu. Futbolçunun qüvvətli zərbəsi qapının üstündən keçdi. İlk hissəyə artırılan vaxtda “bozqurdlar” hesabı açmağa yaxın oldu. Marandiçinin ötürməsinə yüksələn Ottonun başla zərbəsi Rzanı həyəcanlandırsa da, “çərçivə”yə getmədi. İkinci yarıya hər iki tərəf fəal başladı. Sadəcə, ya zərbələrdə, ya da ötürmələrdə dəqiqlik olmaması təhlükəli vəziyyətlərin qolla reallaşması riskini azaldırdı. Oyunda ən real qol vəziyyəti 55-ci dəqiqəyə təsadüf etdi. Sağ cinahla irəliləyən Ottonun qapı qarşısına göndərdiyi ötürməni Höccət uzaqlaşdırsa da, Serranonun önünə düşən top qolla nəticələnə bilərdi. Onun zərbəsindən sonra müdafiəçilərə dəyib istiqamətini dəyişən topu Rza böyük ustalıqla dəf etdi. “Ağ-qaralar”ı müdafiə olunmağa məcbur edən tovuzlular rəqibi məyus edə bildi. 60-cı dəqiqədə Ayxanın zərbəsindən sonra “Neftçi”nin oyunçusuna toxunub Ottonun önünə düşən topu hücumçu tora qovuşdursa da, hakimin ofsayd qərarı üzündən qol ləğv olundu. Qarşılaşmada sükut 72-ci dəqiqədə pozuldu. Rəqibini əks-hücumda yaxalayan “ağ-qaralar”dan Lebonun fərdi ustalığı sayəsində başlatdığı hücum zamanı Ozobiçin qapı qarşısına ötürməsini Boqomolski dəyərləndirdi – 0:1. Qoldan ruhlanan qonaqlar hücumlarının sayını artırdı. 75-ci dəqiqədə Eddinin uzaq məsafədən qüvvətli zərbəsini Aydın çətinliklə dəf edərək, fərqin artmasına imkan vermədi. 84-cü dəqiqədə bakılılar yenə də rəqibi daha diqqətli oynamağa məcbur etdi. Bu dəfə də Lebonun cərimə meydançasına göndərdiyi ötürməni Moreno çətinliklə “çərçivə”yə yönəltsə də, Marandiçi topun boş qapıdan keçməsinə imkan vermədi. Tovuz təmsilçisi 88-ci dəqiqədə stadionu coşdurmağa nail oldu. Belajdinin keçidindən sonra topa qovuşan Nəbiyevin ilk zərbəsi dirəkdən qayıtsa da, başla təkrar zərbəsi tora qovuşdu – 1:1. Uzatma dəqiqələrində Fərid dubl etməyə yaxın oldu. Lakin Rza buna imkan vermədi. Bir qədər sonra yenə də Fərid səhnəyə çıxdı. Futbolçu künc zərbəsindən sonra ona ötürülən topu qüvvətli zərbəylə qapıya göndərsə də, qolkiper sayıqlığı itirmədi. Epizodun davamında Rzadan qayıdan topu isə Şəhriyar boş qapı əvəzinə tirə vurdu. Oyunda sonuncu real qol vəziyyəti elə bu oldu. Beləliklə, tərəflər 1 xalla kifayətləndi.

Gözdən qaçmadı
* “Turan Tovuz” azərkeşləri oyun zamanı “Neftçi”nin qolkiperi Rza Cəfərovun gözünə lazer işığı salırdı.
* Matç başa çatandan sonra “Neftçi”nin futbolçularıyla “Turan Tovuz”un azarkeşləri arasında mübahisə yaşandı.
* Hər iki komandanın baş məşqçisi oyundan sonrakı proseslərə görə sarı vərəqə ilə cəzalandırıldı.
* Artıq 28-ci saniyədə Şəhriyar Moreno ilə mübarizədə zədələndi.

KAMAL SƏFƏR